Այսօր Երևանում մեկնարկել է 5-րդ ամենամյա «Դիջիթեք» բիզնես-ֆորումը: Բացման խոսքում ՀՀ վարչապետ Տիգրան Սարգսյանը արձանագրեց, որ պետության տնտեսական աճի մեջ էական տեղ ունի տեղեկատվական տեխնոլոգիաների ոլորտը: Նրա խոսքով` այսօր ՏՏ ոլորտում զբաղվածների քանակը հավասար է հանքարդյունաբերության ոլորտում զբաղվածների քանակին, բայց աշխատավարձերն ավելի բարձր են. «Սա մեզ համար կարևոր հանգամանք է, որովհետև ՏՏ-ն բարձրացնում է արտադրողականությունը տնտեսության բոլոր ճյուղերում, ինչը, բնականաբար, ենթադրում է, որ մենք ունենալու ենք ավելի հզոր և դիվերսիֆիկացված տնտեսություն, որը պատրաստ կլինի նոր մարտահրավերների»:
Խոսելով ոլորտի խնդիրներից` վարչապետը նշեց, որ կրթական համակարգը չի տալիս անհրաժեշտ քանակի մասնագետներ: Նա խոստացավ ամեն կերպ աջակցել և խթանել, որպեսզի կրթական համակարգը բավարարի ՏՏ ոլորտի պահանջարկը:
Այս տարի «Դիջիթեք» բիզնես-ֆորումին մասնակցում են շուրջ 59 կազմակերպություններ, նախորդ տարվա համեմատ աճը 48 տոկոս է:
Ֆորումից հետո վարչապետը շրջեց ցուցահանդեսի սրահում, ծանոթացավ նորարար լուծումներին. ի դեպ, Տիգրան Սարգսյանը սովորականից ավելի երկար կանգ առավ «Նորք» տեղեկատվավերլուծական տաղավարի մոտ, որտեղ Սեգաֆրեդոն հյուրասիրեց, նա համտեսեց խմորեղեն և սառը սուրճ:
