Կոլումբիայի խորհրդարանը հաստատել է մի օրենք, համաձայն որի` սահմանվում են այն սկզբունքները, որոնք թույլ կտան խաղաղ բանակցություններ վարել երկրի կառավարության և ապստամբների միջև։ Այս մասին հաղորդում է BBC-ն։
Այս օրենքը ստացել է երկրի նախագահ Խուան Մանուել Սանտոսի աջակցությունը և փաստում է այն մասին, որ երկրի ներկայիս իշխանությունների դիրքորոշումը զգալիորեն տարբերվում է նախորդների քաղաքականությունից, որոնք բացառում էին զինված խմբավորումների հետ որևէ բանակցություն։ Համաձայն այս օրենքի՝ ապստամբների խմբավորումների անդամների նկատմամբ կարող են կիրառվել ավելի մեղմ պատիժներ, եթե նրանք ընդունեն իրենց մեղքը և փոխհատուցեն զինված հարձակումների զոհերին։
Իրավապաշտպան կազմակերպությունները, ինչպես նաև նախկին նախագահ Ալվարո Ուրիբեի կողմնակիցները պնդում են, որ այս օրենքի ընդունումից հետո շատ հանցագործություններ կմնան առանց բացահայտման, իսկ մեղավորները չեն պատժվի։
