Հունիսի 14-ին երդվյալ ատենակալները մերժել են Սթիվեն Բոլդուինի հայցն ընդդեմ Քևին Քոսթների։ Այս մասին հաղորդում է Associated Pres գործակալությունը։
Ժամանակին Բոլդուինն ու Քոսթները գործընկերներ են եղել։ Մենք տեղեկացրել էինք, որ Բոլդուինը մեղադրել էր Քոսթներին նրանում, որ վերջինս չէր տեղեկացրել, թե գործարք է կնքվելու Ocean Therapy Solutions ընկերության, որի բաժնետերեր էին Բոլդուինն ու Քոսթները, և British Petroleum-ի միջև։ Բոլդուինը պնդում է, որ չիմանալով այս գործարքի մասին, ինչն ապագայում հանգեցնելու էր Ocean Therapy Solutions-ի կապիտալիզացիայի ավելացմանը, ինքը վաճառել է իր բաժնեմասը և, հետևաբար, չի ստացել ավելի մեծ օգուտներ, որոնք եղել են վերոնշյալ գործարքի արդյունքում։
Խոսքը Ocean Therapy Solutions ընկերության կողմից ջուրը նավթից մաքրող սարքավորման վաճառքի մասին է, որը անհրաժեշտ է եղել BP-ին Մեքսիկական ծոցում նավթի արտահոսքից հետո: Սարքի համար համաձայնել են վճարել 52 մլն դոլար, որից 18 մլն-ը վճարվել է կանխիկ:
