«Այս տարվա հունիսի 2-ին ուժի մեջ մտավ փետրվարի 7-ին ընդունված «Վարչական իրավախախտումների վերաբերյալ ՀՀ օրենսգրքում փոփոխություններ և լրացումներ կատարելու մասին» օրենքը: Այդ փոփոխություններով ճանապարհային երթևեկության բազմաթիվ խախտումների համար նախատեսված տուգանքներն ավելացվեցին, և բացի այդ՝ «սահմանվեցին» նոր խախտումներ»,- գրում է «ՀԺ»-ն և հավելում.
«Դրանցից էր տեխզննման կտրոնը դիմապակուն փակցնելու պարտադրանքը: Նախկինում դա պարտադիր չէր, իսկ հունիսի 2-ից տեխզննման կտրոնը դիմապակուն չփակցնելու համար սահմանվեց տուգանք՝ 20 հազար դրամի չափով: Սովորական, այսպես ասենք, շարքային վարորդները շտապեցին կատարել օրենքի այդ պահանջը՝ տուգանքից խուսափելու նկատառումներով, քանի որ պետավտոտեսուչները ձեոքներից բաց չեն թողնում վարորդ տուգանելու ցանկացած հնարավորություն:
Բայց Հայաստանում, ինչպես հայտնի է, կան մարդիկ, որոնց խախտումները պետավտոտեսչությունը գերադասում է չնկատել: Օրինակ, ԱԱԾ պետ Գորիկ Հակոբյանի ծառայողական մեքենայի դիմապակուց բացակայող տեխզննման կտրոնը ոչ մի պետավտոտեսուչ, բնականաբար, չի նկատել: Կամ էլ նկատել է, բայց համոզված է, որ տեխզննման կտրոնը փակում է ԱԱԾ պետի տեսադաշտը և խանգարում է նրան տեսնել մեր երկրի ազգային անվտանգությանը սպառնացող վտանգները, ու որոշել է չնկատելու տալ:
Կամ էլ՝ ԱԱԾ-ում փողերի լվացման դեմ պայքարին զուգընթաց, տանում են տեխզննման կտրոնների լվացման դեմ պայքարի պրոֆիլակտիկ աշխատանքներ, և այդ նպատակով, որպես դիդակտիկ նյութ, որոշել են օգտագործել հենց իրենց պետի ավտոմեքենայի տեխզննման կտրոնը: Երևի նմանատիպ նկատառումներով պետավտոտեսուչները «չեն նկատել» նաև ՀՀ պետեկամուտների կոմիտեի նախագահ Գագիկ Խաչատրյանի, ՀՀ փոխոստիկանապետ Արթուր Օսիկյանի ծառայողական մեքենաների դիմապակիներից բացակայող կտրոնները: Փոխարենը, դա նկատել է մեր թղթակիցը երեկ՝ կառավարության շենքի մոտ, բայց չպատկերացնելով տվյալ անձանց մեքենաների դիմապակուն տեխզննման կտրոնը փակցնելու ծանր ու անդառնալի հետևանքները, միամտաբար լուսանկարել է դրանք»: