«Ժառանգություն» կուսակցության նախկին պատգամավոր Արմեն Մարտիրոսյանը չի բացառում, որ Ընտրությունների վերահսկման միասնական շտաբի մաս կազմող ուժերը՝ Հայ ազգային կոնգրեսը, ՀՅԴ-ն ու «Բարգավաճ Հայաստան»-ն ի շահ ՀՀ ԱԳ նախկին նախարար Վարդան Օսկանյանի պաշտպանության մոբիլիզացնեն իրենց ուժերը: Նման տեսակետ նա հայտնեց «Առաջին լրատվական»-ի հետ զրույցում:
«Համապատասխան մթնոլորտի ձևավորման դեպքում այդ ուժերը կարող են սատարել Օսկանյանին: Չեմ կարծում, որ ՀԱԿ-ի ու ՀՅԴ-ի համար սա անհաղթահարելի որոշում լինի: Պարզապես պետք է, որ Վարդան Օսկանյանն առավել շատ չարչարվածի կերպար ստանա»,- ասաց նախկին խորհրդարանականը:
Հիշեցնենք, որ օրերս ՀՀ նախկին արտգործնախարար, «Սիվիլիթաս» հիմնադրամի նախկին նախագահ և այժմ ԱԺ պատգամավոր Վարդան Օսկանյանն Ազգային անվտանգության ծառայությունում քննվող քրեական գործի շրջանակներում կանչվել է ԱԱԾ և որպես վկա՝ հարցաքննվել:
Նախկին պաշտոնյան հրավիրել էր ցուցմունք տալու Քրեական օրենսգրքի 190-րդ հոդվածի 3-րդ կետի («Հանցավոր ճանապարհով ստացված եկամուտներն օրինականացնելը (փողերի լվացումը)») հատկանիշներով հարուցված քրեական գործի շրջանակում, որն առնչվում է իրեն և իր հիմնադրած «Սիվիլիթաս» հիմնադրամի գործունեությանը:
Ավելի ուշ Օսկանյանը հանդես էր եկել հայտարարությամբ, որտեղ նշել էր. «Զարմանալի է, որ նման հարց առաջ է քաշվում հենց այն ժամանակ, երբ ես ներգրավվել եմ քաղաքական գործընթացներում: Ակնհայտ է, որ հարուցված քրեական գործի հետևում քաղաքական պատվեր կա»:
