Լոս Անջելեսում մահացել է նախկին մաֆիոզ Հենրի Հիլը, որը որպես նախատիպ է ծառայել Մարտին Սկորսեզեի նկարահանած «Goodfellas» քրեական դրամայի գլխավոր հերոսի համար: Այս մասին հայտնում է Agence France-Presse-ը:
69-ամյա Հիլին մահը վրա է հասել հունիսի 12-ին Լոս Անջելեսի հիվանդանոցներից մեկում: Պատճառը եղել է սրտի կանգը: Նա երկար ժամանակ առողջական խնդիրներ է ունեցել:
Հենրի Հիլը ծնվել էր Բրուկլինում 1943 թվականին: 50-ականներին դարձել է Լուկկեզե մաֆիոզ կլանի անդամ: 1967 թվականին նա մասնակցել է Ջոն Քենեդու անվան միջազգային օդանավակայանի թալանին՝ գողանալով կես միլիոն դոլար: 1978 թվականին նա օգնել է կազմակերպել օդանավակայանի երկրորդ խոշոր թալանը: Այդ անգամ հանցագործները հեռացել էին 5 միլիոն դոլարով:
1980 թվականին Հիլը, իմանալով, որ մաֆիան ծրագրում է սպանել իրեն, դառնում է Հետաքննությունների դաշնային բյուրոյի անդամ և մասնակցում ականատեսների պաշտպանության ծրագրին: Նրա ցուցմունքների հիման վրա հաջողվել է դատապարտել ավելի քան 100 մաֆիոզի:
Մաֆիայի հետ հարաբերությունները խզելուց հետո, Հիլն օրինապաշտ քաղաքացի չի դարձել: Նա օրենքի հետ բազմիցս խնդիրներ է ունեցել թմրանյութերի վաճառք իրականացնելու և մեքենայությունների համար: 1990-ին նրան հեռացնում են ծրագրից:
Նիկոլաս Պիլեջիի «Խելամիտը» 1986 թ. հրատարակված գրքի հիմքում ընկած է Հիլի կյանքի պատմությունը: 1990 թվականին Մարտին Սկորսեզեն էկրանավորել է այն: Ֆիլմում Հիլի դերը կատարում է Ռեյ Լիոտան:
