Ոստիկանության Անձնագրերի և վիզաների վարչության պետի տեղակալ Արմեն Հակոբյանը «Ազատություն» ռադիոկայանի հետ զրույցում փոխանցել է, որ եթե 2010 թվականին Հայաստանի քաղաքացիություն ստանալու համար դիմել էին Սիրիայի 422 քաղաքացիներ, ապա 2011-ին` ավելի քան 3000: Ուշագրավ է, որ միայն այս տարվա առաջին երեք ամիսների ընթացքում ՀՀ քաղաքացիություն ստանալու համար դիմել են 1554 սիրիացի, որոնց զգալի մասը սիրիահայեր են:
Ինչ վերաբերում է կացության կարգավիճակ ստացածներին, ապա, վարչության Վիզաների և օտարերկրացիների հաշվառման բաժնի պետ Արթուր Սահակյանի փոխանցմամբ, միայն վերջին երկու տարիների ընթացքում Հայաստանում կացության կարգավիճակ է ստացել 300 սիրիահայ:
Հայաստանի քաղաքացիություն ձեռք բերելու և Հայաստան տեղափոխվելու ցանկություն ունեցողների նման աճը, բնականաբար, պայմանավորված է Սիրիայում ստեղծված իրավիճակով: Տեղի հայերն այլևս իրենց անվտանգ չեն զգում և փորձում են ապաստան գտնել այլ երկրներում, մասնավորապես` Հայաստանում:
Հայր Անդրանիկը, ով Սիրիայի հայ կաթողիկե համայնքի համայնքապետն է, «Ազատություն» ռադիոկայանի հետ զրույցում փաստել է, որ իրոք վերջին շրջանում ավելի շատ սիրիահայեր են դիմում ՀՀ քաղաքացիություն ստանալու համար:
«Ոչ մի տարակույս, որ վիճակը շատ թեժ է և տագնապը մարդկանց մոտ ստեղծում է վախի և անապահովության մթնոլորտ», – ասել է նա` նշելով, որ անձամբ ինքը պահում է միայն իր սիրիական քաղաքացիությունը, որպեսզի «ժողովուրդը զգա, որ իրենք ո’չ վախենում են, ո’չ էլ մտածում են փախչելու մասին»:
Հայր Անդրանիկի խոսքով, իրավիճակը ոչ բոլոր վայրերում է լարված, Սիրիայի հյուսիսային շրջաններում, օրինակ, խաղաղ է: Սակայն թուրքական և լիբանանյան սահմաններին մոտ գտնվող վայրերում «ահաբեկիչները մեծ վնասներ են հասցրել քրիստոնյա փոքրամասնությանը և մանավանդ տեղի հայերին»: Մասնավորապես, Հոմսում այրել են հայկական եկեղեցին, թալանել և կողոպտել են հայկական թաղամասը: Այդտեղ բնակվող մոտ 2 հազար հայերի մեծ մասն արդեն հեռացել է քաղաքից:
«Իմ եղբոր` Գևորգի զոքանչը ասում է` մենք մեծ գումար վճարեցինք ահաբեկիչներին, որպեսզի դուրս հանեինք մեր ընտանիքը: Որպեսզի թողնեին, որ դուրս գանք առանց սպանելու կամ վնաս հասցնելու», – պատմել է նա:
Հայ կաթողիկե համայնքի ղեկավարի համոզմամբ, այդ թալանն ու կողոպուտն իրականացնողները սիրիացիներ չեն. – «Լիբիացիներ, պակիստանցիներ, դժբախտաբար, նաև լիբանանցիներ»:
Նրա համոզմամբ, եթե օտարազգի ահաբեկիչները դուրս գան Սիրիայից, ապա ամեն ինչ երկրում կկարգավորվի. – «Ափսոս, որ Սիրիան իսլամական այս ներխուժող ահաբեկիչների ձեռքով է վերջանում… Եվրոպացիք չեն հասկանում, թե ինչ մեծ աղետ են պատրաստում Արևելքի քրիստոնյա համայնքների դեմ: Իրենք սարքում են մեր գերեզմանատունը»:
Հալեպից մի քանի օր առաջ Երևան եկած 22-ամյա ուսանող Պետրոսը «Ազատություն» ռադիոկայանի հետ զրույցում ասել է, թե Հալեպում դեռ հանգիստ է. – «Քիչ վախ կա, ասենք, փոքրիկների համար, դպրոց գնալու համար… Հայերը ավելի շատ իշխանության կողմն են: Մենք արդեն 30 տարի վարժվել ենք, իշխանությունը օգնում է, պաշտպանում է մեզ: Մյուս կողմերը եթե գան, ավելի կավիրեն»:
Նրա կարծիքով, եթե ընդդիմությունը իշխանության գա, շատ հավանական է, որ Սիրիայում հայեր չմնան:
Պետրոսն էլ փաստում է, որ վերջին շրջանում ավելի շատ հայեր են արտագաղթում Սիրիայից և հիմնականում գալիս են Հայաստան` հաշվի առնելով նաև այն հանգամանքը, որ այլ երկրների դեսպանատները չեն գործում:
Հարցին, թե ինչու են արտագաղթում Պետրոսը պատասխանել է. – «Շատը վախ է: Վախենում են, որ ավելի վատ կլինի»:
Անձամբ Պետրոսը շատ է ուզում գալ Հայաստան, արդեն դիմել է Հայաստանի քաղաքացիություն ստանալու համար և անհամբերությամբ սպասում է պատասխանի:
