Դմիտրի Մեդվեդևի՝ Ռուսաստանի նախագահ եղած ժամանակ ԼՂ հակամարտության հարցում այդ երկրի հետաքրքրվածությունն ավելի մեծ էր. այժմ հարցով ավելի հետաքրքրված է Արևմուտքը: Այսօր տեղի ունեցած մամուլի ասուլիսի ժամանակ նման տեսակետ հայտնեց Հայաստանի ազգային արխիվի փոխտնօրեն Էդգար Հովհաննիսյանը:
Նրա խոսքով՝ ղարաբաղյան պատերազմը չի ավարտվել, սակայն դրա վերսկսման հավանականությունը շատ փոքր է:
«Ադրբեջանական կլանն ինքը պատերազմ սկսելու ցանկություն չունի: Ներքին սպառմանն ուղղված հայտարարությունները չեն կարող պատերազմի հանգեցնել: Այնպես որ, այս պահի դրությամբ իրական վտանգ գոյությունչունի: Ճիշտ է, Ադրբեջանը շարունակաբար վերազինվում է, սակայն գոյություն ունեն մի շարք հանգամանքներ, որոնք պետք է հաշվի առնի պատերազմ սկսելուց առաջ:
Պարզապես այդ երկիրը միջազգային հանրությանը ջանում է ցույց տալ, որ տարածաշրջանային խաղաղությունը կախված է իրենից: Սրանով Իլհամ Ալիևը իրեն ուզում է վաճառել Արևմուտքին, լուծել ժառանգականության հարցը՝ նախագահի պաշտոնում հաստատելով իր կնոջը, կամ նախագահել երրորդ ժամկետում: Միջազգային հանրությունն իր հերթին փորձում է բալանսավորված վարքագիծ դրսևորել հակամարտող կողմերի նկատմամբ»,- ասաց Էդգար Հովհաննիսյանը՝ հավելելով, որ Ադրբեջանի քաղաքականությունը նավթոտ է, թաղված նավթադոլարների մեջ:
Էդգար Հովհաննիսյանի համոզմամբ՝ նման պարագայում Հայաստանը պետք է ապավինի իր բանակին:
Նրա խոսքով՝ ԼՂՀ-ի՝ կրկին բանակցային կողմ դառնալու մասին խոսելն այս պահի դրությամբ այնքան էլ իրատեսական չէ, սակայն նման իրողությունը թույլ կտա ավելի արագ ու համակարգված լուծել խնդիրը:
Հիշեցնելով, որ հուլիսի 19-ին ԼՂՀ-ում նախագահական ընտրություններ են տեղի ունենալու, Հայաստանի ազգային արխիվի փոխտնօրենը նկատեց, որ ի հեճուկս Ադրբեջանի՝ դրանք լինելու են տարածաշրջանում ամենաազատ ու արդար նախագահական ընտրությունները:
