Վերաքննիչ քրեական դատարանում, պաշտպանի բացակայության պատճառով հետաձգվեց անչափահաս Մարինեի առևանգման և բռնաբարության գործով դատաքննությունը, որը հասկանալի պատճառներով անցկացվելու է դռնփակ կարգով:
Խոսքը Աբովյան քաղաքի բնակիչ, 24-ամյա Դավիթ Օսիպյանի «հերոսության» մասին է, որը կնոջը թողել էր տանը և որոշել մի օր լավ զվարճանալ. պայմանավորվել էր Աբովյան քաղաքի բնակիչ, իր ծանոթ, անչափահաս՝ 17-ամյա Մարինեի (անունը փոխված է) հետ և 2010թ. նոյեմբերի 23-ին Երևան քաղաքում հանդիպել նրան: Պայմանավորվել էին ժամանակն ավելի հետաքրքիր անցկացնել և միասին գնացել էին Երևան քաղաքի Կորյուն փողոցում գործող «Դուետ» բար-սրճարան: Եվ քանի որ Դավիթի միտքը ծուռ էր եղել, տեղավորվել էին առանձնասենյակներից մեկում: Քրեական գործի նյութերից երևում է, որ որոշ ժամանակ անց Օսիպյանը որոշել է ցանկացած գնով հասնել իր նպատակին` պատվազրկել Մարինեին: Վերջինս դիմադրել է, դիմադրությունը կոտրելու համար Դավիթը սկսել է բռնություն գործադրել աղջկա նկատմամբ` ապտակելով, քաշքշելով և միջկրծքային հատվածի, աջից որովայնի առաջնային մակերեսի քերծվածքների, աջ ազդրի վերին երրորդականի առաջաներսային մակերեսի արյունազեղման ձևերով նրա առողջությանը թեթև վնասի հատկանիշներ չպարունակող մարմնական վնասվածքներ պատճառելով, ապա բռնաբարել է անչափահասին:
Թվացել է, թե ամեն ինչ ավարտված է, սակայն Մարինեին դեռ դրա շարունակությունն էր սպասվում: Դավիթը սկսել է հոգեբանական ճնշում գործադրել աղջկա նկատմամբ. սպառնացել է, որ կհրապարակի նրան պատվազրկելու փաստը: Մարինեն տեղի է տվել, և օգտվելով վերջինիս անօգնական վիճակից՝ նույն օրը Դավիթը խաբեությամբ` տուն տանելու պատրվակով, բար-սրճարանից պատահական տաքսի ավտոմեքենայով առևանգել է անչափահասին և տուն տանելու փոխարեն, տարել մայրաքաղաքի ծայրամասում գտնվող «Էրզրում» հյուրանոցային համալիր:
Այստեղ՝ առանձնասենյակներից մեկում, Դավիթը կրկին տուժողի անօգնական վիճակն օգտագործելով, հակառակ նրա կամքին` սեռական հարաբերություն է ունեցել նրա հետ: Սակայն գիշերը միասին անցկացնելուց հետո էլ Դավիթը չի սթափվել կամ գուցե չի կողմնորոշվել՝ ինչ անել բռնաբարելուց բացի. հաջորդ օրը` նոյեմբերի 24-ին, Օսիպյանը կրկին տաքսի է վարձել ու Մարինեին այս անգամ տարել մայրաքաղաքի մեկ այլ ծայրամասային թաղամաս՝ Նուբարաշենում գտնվող «Զոր Սամ Սաք» ընկերությանը պատկանող հյուրանոց: Այստեղ էլ առանձնասենյակներից մեկում Մարինեն կրկին սեռական բռնության է ենթարկել:
Կարճ ժամանակ անց ամեն ինչ պարզվել է, և Դավիթ Օսիպյանը կալանավորվել է: Նրան մեղադրանք է առաջադրվել ՀՀ քրեական օրենսգրքի 131-րդ հոդվածի 2-րդ մասի 4-րդ կետով (անչափահասի առևանգումը) և 138-րդ հոդվածի 2-րդ մասի 3-րդ (անչափահասի բռնաբարությունը) ու 5-րդ կետերով (Քրեական օրենսգրքի փոփոխություններով՝ 2011-ի մայիսին ուժը կորցրած է ճանաչվել): Դրանցից առաջին հոդվածը նախատեսում է 4-8 տարվա ազատազրկում, իսկ երկրորդը` 4-10 տարվա: Առաջին ատյանի դատարանը Դավիթ Օսիպյանին մեղավոր էր ճանաչել առաջադրված մեղադրանքներում և նրան դատապարտել 7 տարվա ազատազրկման: Պաշտպանական կողմը բողոքարկում է դատավճիռը:
Ամբաստանյալի մայրը թերթերից մեկի հետ զրույցում նշել է, որ իր որդին ամուսնացած է, և որ անչափահաս աղջիկն է իր որդու վրա աչք դրել…
Համենայնդեպս, այն հանգամանքը, որ Օսիպյանը հատուկ նպատակով, դիտավորությամբ է եկել Մարինեին տեսնելու` փաստում է նրա մոտ եղած մեծ գումարի առկայությունը, այլապես հանցագործությունը շարունակելու հնարավորություն պարզապես չէր ունենա: Բայց եթե հավատալու լինենք Դավիթի մորը, հնարավոր է, որ Դավիթին Մարինեն է փող տվել, որ իրեն օբյեկտներով «քաշ տա ու բռնաբարի»:
