Անընդունելի է, որ Իսրայելը Հայոց ցեղասպանության թեման շահարկի քաղաքական նպատակներով կամ պատեհապաշտությունից դրդված: «Առաջին լրատվական»-ի հետ զրույցում նման տեսակետ հայտնեց Հայոց ցեղասպանության թանգարան-ինստիտուտի տնօրեն Հայկ Դեմոյանը՝ տեղեկացնելով, որ Իսրայելի Քնեսեթում Ցեղասպանության թեմայի շուրջ ծավալված վերջին օրերի քննարկումների շրջանակներում նույն տեսակետն ինքը հայտնել է նաև իսրայելական թերթերից մեկի թղթակցի հետ զրույցում:
«Նմանօրինակ գործողությունները, եթե անգամ բարի նպատակներ են հետապնդում, անդրադառնալու են նաև Հոլոքոստի հիշողության վրա: Եթե խնդրին նայում ես բարոյական տեսանկյունից, առանձին ցեղասպանության զոհ չկա, կան ցեղասպանության զոհեր»,- ասաց Հայկ Դեմոյանը:
Հարցին՝ ո՞րն է քաղաքական այն նպատակահարմարությունը, որը Քնեսեթում Ցեղասպանության հարցի բուռն քննարկումների պատճառ է դարձել, Հայոց ցեղասպանության թանգարան-ինստիտուտի տնօրենը պատասխանեց՝ 2010 թվականի մայիսի 31-ին դեպի Գազա ուղևորվող թուրքական «Մավի Մարմարա» նավի վրա գրոհած իսրայելցի զինծառայողների գործի հետ կապված վերջին զարգացումները:
Հայկ Դեմոյանի խոսքերով՝ Հայաստան-Իսրայել հարաբերություններ, մեծ հաշվով, գոյություն չունեն: Ավելին, այս պահի դրությամբ նախադրյալներ չկան, որ մոտ ժամանակահատվածում այդ հարաբերությունները կխորանան:
