ՊԵԿ տեղեկատվության և հասարակայնության հետ կապերի բաժնից «Առաջին լրատվական»-ին հայտնեցին, որ ՊԵԿ-ը ներդրել է հարկային և մաքսային ծառայության անձնակազմի կանոնավոր և համապարտադիր ուսուցման մեխանիզմ: Հարկ վճարողների սպասարկման որակի բարելավմանը համընթաց, կոմիտեի նախագահի կողմից հստակ խնդիր է դրվել բարձր մակարդակի բերել նաև աշխատակիցների մասնագիտական որակը. առանց բարձրակարգ կադրերի հնարավոր չէ որակյալ բարեփոխումներ իրականանցել: Ինչպես բազմիցս նշել է ՊԵԿ ղեկավարությունը, ուսումնական գործընթացները մշտապես կոմիտեի տեսադաշտում են. տնտեսագիտական համալսարանի հենքի վրա ներդրվել է եռաստիճան ուսումնական ծրագիր: ՊԵԿ-ՀՊՏՀ համագործակցությամբ բուհում արդեն իսկ հարկային և մաքսային ոլորտների մասնագիտացմամբ մագիստրոսի կրթական ծրագիր է իրականացվում:
Համակարգի կադրերի շարունակական վերապատրաստման գործառույթը հիմնականում վերապահված է ՊԵԿ նորաստեղծ «Ուսումնական կենտրոն»-ին, որը գործում է Քանաքեռ-Զեյթուն վարչական շրջանում տեղակայված նորակառույց շենքում: «Ուսումնական կենտրոն»-ի աշխատանքներին ծանոթանալու նպատակով կենտրոն է այցելել կոմիտեի նախագահ Գագիկ Խաչատրյանը: Նա շրջել է «Ուսումնական կենտրոն»-ում, հետևել ուսումնական գործընթացներին, զրուցել նաև դասընթացների մասնակիցների հետ: Գագիկ Խաչատրյանն ընդգծել է, որ համակարգի բոլոր աշխատակիցները` քաղծառայողներից մինչև ստուգող տեսուչներ, մաքսային մարմիններում սահմանային մաքսակետերի տեսուչներից մինչև վերադաս մաքսային մարմինների համապատասխան ստորաբաժանումների աշխատակիցներ պետք է մասնակցեն ուսումնական ծրագրերին. «Նպատակը մեկն է` կադրերի հետ տարվող աշխատանքներում ունենալ ճիշտ գնահատականներ և կարողանալ ստեղծել կադրային ռեսուրսներ»:
Դասընթացների ավարտին հարկային և մաքսային ծառայողների գիտելիքները գնահատվելու են որակավորման հանձնաժողովի կողմից` հաշվի առնելով նաև ուսումնական պրոցեսի ընթացքում ստացված գնահատականները: Կոմիտեի նախագահը կոչ է արել ակտիվ ներգրավվել ուսումնական գործընթացներին, բացառել նախկինում գոյություն ունեցող ձևական մոտեցումները: «Ուսումնական այս ծրագրերը մեզ համար շատ կարևոր են, որպեսզի կարողանանք իրականացնել մեր առջև դրված խնդիրները, որոնք ընդգրկված են ՀՀ նախագահի կողմից հաստատված մեր ծրագրերում»:
