News Georgia-ի փոխանցմամբ՝ այս տարվա առաջին եռամսյակին Վրաստանի տնտեսության մեջ կատարված ուղիղ ներդրումները հասել են 270 միլիոն դոլարի, և դա շատ լավ ցուցանիշ է: Այս մասին այսօր կառավարության նիստում հայտարարել է Վրաստանի վարչապետ Նիկա Գիլաուրին:
Վերջինիս խոսքերով՝ այս տարվա առաջին եռամսյակում կատարված ներդրումների ծավալը 60-65 տոկոսով գերազանցում է նախորդ տարվա միևնույն ժամանակահատվածի ցուցանիշը: Գիլաուրին, սակայն, կարծում է, որ 2011 թվականը նույնպես վատ չի եղել ներդրումների կատարման տեսանկյունից.
«Մենք նույնպիսի ցուցանիշներ ակնկալում ենք նաև երկրորդ եռամսյակում: Դա լավ է, քանի որ ուղիղ ներդրումներն ուղղակիորեն կապված են նոր աշխատատեղերի ստեղծման հետ: Ներդրումների ուղիղ աճը ենթադրաբար նշանակում է, որ այս տարի գործազրկության մակարդակը նախկինի նման նվազելու է»:
