Լեհաստանի մայրաքաղաք Վարշավայում երեկ ռուս և լեհ երկրպագուների միջև տեղի ունեցած բախումից հետո ձերբակալվել է 184 մարդ՝ 156 լեհ և 24 ռուս: Այս մասին, ինչպես հաղորդում է ITAR-TASS-ը, այսօր տեղի ունեցած մամուլի ասուլիսում հայտարարել է երկրի ներքին գործերի նախարար Յացեկ Չիխոցկին:
Նա հայտնել է, որ երկրպագուների մեծ մասը՝ և՛ ռուսները, և՛ լեհերը, հիմնականում իրենց հանգիստ են պահել, իսկ ոստիկանությունը կարողացել է նրանց մեկուսացնել սադրիչներից և անվտանգ հասցնել մինչև մարզադաշտ:
«Վարշավայում մի քանի միջադեպեր են տեղի ունեցել, որոնք չպետք է տեղի ունենային: Ես ամաչում եմ նրանց փոխարեն, ովքեր եկել էին ոչ թե երկրպագելու, այլ սադրանքների համար: Նրանք երկրպագուներ չեն, նրանք հասարակ խուլիգաններ են»,- ասել է Լեհաստանի սպորտի և զբոսաշրջության նախարարը:
Վարշավայում ռուսների և լեհերի միջև բախումը տեղի է ունեցել Ռուսաստան-Լեհաստան խաղից առաջ կազմակերպված ռուսների երթի ժամանակ: Իրավապահներով շրջապատված ռուս երկրպագուների վրա փորձել են հարձակվել մի խումբ լեհեր: Անվտանգության նկատառումներով՝ ռուս և լեհ երկրապագուներին մարզադաշտ են թողել առանձին մուտքերից: Ոստիկանությունն արագ արձագանքել է կռիվներ հրահրելու փորձերին՝ օգտագործելով ռետինե մահակներ և արցունքաբեր գազ:
Խաղի ընթացքում և խաղից հետո քաղաքի տարբեր հատվածներում նույնպես անկարգություններ են տեղի ունեցել:
