«Վարորդների միջև տեղի է ունեցել կոնֆլիկտ, որը հասցրել է մահվան: Խնդիրն այն է, որ վարորդները, տնտեսվարողները, ուղևորները մշտական կոնֆլիկտի մեջ են: Ֆիզիկապես ծեծում են… ծեծում էին, այնպես են վախեցրել, որ ասել են՝ ժամը 7-ից հետո չերևաս»,- այսօր լրագրողների հետ հանդիպմանը հայտարարեց Հայաստանի Սպառողների ասոցիացիայի նախագահ Արմեն Պողոսյանը:
Նրա խոսքով՝ մեր երկրում հասարակական տրանսպորտի մասին օրենք չկա, չեն սահմանվում լիցենզավորման կարգը, վերաբաշխումը և այլն: Երևանում գոյություն ունեն տրանսպորտի զարգացման հայեցակարգ և սխեմա, որով միկրոավտոբուսների թիվն էականորեն կրճատվելու է, բայց թե ոնց և երբ պետք է զարգանա, ըստ բանախոսի՝ գոյություն չունի:
Քաղաքի գլխավոր հատակագծով միկրոավտոբուսների քանակը պետք է նվազեցվի մինչև 19.2%, այժմ նախկին 90%-ից իջել է 72%-ի: 240 չինական ավտոբուս ներկրվեց, որոնք, ըստ Ա. Պողոսյանի, հարմարավետ չեն, հիմա էլ առևտրային գներով 300 հատ են ձեռք բերելու:
«Գծի տեր ասվածից օգտվում են մի քանի հոգի՝ տառապում են բոլորը: Կոռուպցիան մեր երկրում 50%-ից ավելի է, իսկ տրանսպորտը մի առանձնահատուկ ձեռնարկատիրության ձև է, որտեղ ստվերային շրջանառությունն անվերահսկելի է: 49 միկրոավտոբուսները վարում են փաստաթղթերով ձևակերպված 3 վարորդներ: 115 երթուղու չհաշվարկված եկամուտը օրական մոտ 25 հազար դոլար է»,- ասաց Ա.Պողոսյանը:
