Մյունխենի անվտանգության քաղաքականության հարցերով միջազգային 47-րդ համաժողովում շարունակվում են քննարկումները Եգիպտոսում ստեղծված իրավիճակի շուրջ: Մենք արդեն տեղեկացրել էինք, որ Եգիպտոսի ներքաղաքական զարգացումները վերջին պահին են հայտնվել այդ համաժողովի օրակարգում, սակայն դարձել են ամենաքննարկվողը:
Գերմանիայի կանցլեր Անգելա Մերկելը նույնպես որոշ հետաքրքիր հայտարարություններ է արել այս հարցի կապակցությամբ` նշելով, որ իրավիճակն այս երկրում նման է այն իրավիճակին, որ ստեղծվել էր Գերմանիայի` երկու մասի բաժանված ժամանակաշրջանում. «Եթե ինչ-որ մեկը գար Արևմտյան Գերմանիայից (Գերմանիայի կանցլեր Անգելա Մերկելը ծնունդով Արևելյան Գերմանիայից է,– խմբ.) և մեզ ասեր, թե մենք ոնց գործենք, մենք կխնդրեինք նրան լքել սենյակը»:
Մերկելն ասել է, որ Եգիպտոսի քաղաքացիներն իրենք պետք է որոշեն, թե ով պետք է լինի նոր իշխանությունն այդ երկրում: Ընդ որում, նա հատկապես շեշտել է, որ արտաքին միջամտություն այս հարցում չպետք է լինի:
«Եգիպտոսում տեղի կունենան փոփոխություններ, սակայն անհրաժեշտ է, որպեսզի դրանք տեղի ունենան խելամիտ և խաղաղ կերպով»,- ասել է Մերկելը:
