«Փակ շուկայի» հարցում մեղավորներին պատասխանատվության ենթարկելու հարցը չպետք է շրջանցվեր: Այսօր «Առաջին լրատվական»-ի հետ զրույցում նման տեսակետ հայտնեց ԱԺ 4-րդ գումարման խորհրդարանի պատգամավոր, «Փրկենք Փակ շուկան» նախաձեռնության ակտիվիստ Ստեփան Սաֆարյանն` անդրադառնալով «Փակ շուկա»-ում տեղի ունեցածի վերաբերյալ ուսումնասիրություն կատարելու նպատակով ՀՀ մշակույթի նախարարության և Երևանի քաղաքապետարանի համատեղ ջանքերով ստեղծված մասնագիտական հանձնաժողովի եզրակացությանը:
Ստեփան Սաֆարյանը ցավով նշեց, որ մասնագիտական հանձնաժողովի համար կարող է շրջանցվել «Փակ շուկայում» տեղի ունեցածի մեղավորներին պատասխանատվության ենթարկելու հարցը: Ըստ նրա` հանձնաժողովը, որի կազմում ընդգրկվել են շատ հեղինակավոր վաստակաշատ ճարտարապետներ, պետք է նաև հասկանա, որ սա մի շենքի հետ պատահած խնդիր չէ, և եթե մենք այս մթնոլորտը թողնենք, նույնատիպ իրավիճակների ենք բախվելու, երբ որևէ մեկի քմահաճույքներով, պատկերացումներով կամ ճաշակով վտանգի տակ դրվեն այլ հուշարձաններ ևս: Ստեփան Սաֆարյանի համոզմամբ` սա կարող է նախադեպ դառնալ:
«Ստացվում է, որ կարելի է ավիրել շենքը, և դրա համար որևէ պատասխանատվություն կրող չկա: Վատ է, որ ճարտարապետներին և պետական պաշտոնյաներին չի հետաքրքրում այս հարցը, հետաքրքրում է քաղաքացիներին, և նրանք անում են այն, ինչը կարողանում են անել»,- նկատեց Ստեփան Սաֆարյանը:
Նա հրապարակավ հարց ուղղեց հանձնաժողովի կազմում ընդգրկված հեղինակավոր ճարտարապետներին. «Ենթադրենք` հանձնաժողովի ճարտարապետները պատասխանատվության հարց բարձրացնելը նպատակահարմար չեն գտնում, սակայն իրենք օրենքները գիտեն, իրենք օրենքների կիրառողներն են, իրենք ի՞նչ են կարծում` տեղի ունեցածը քրեորեն պատժելի արա՞րք է, թե՞ ոչ»:
Ստեփան Սաֆարյանը հիշեցրեց, որ պատասխանատվության ենթարկելու հարցն արդեն իսկ բարձրացրել է «Փրկենք Փակ շուկան» քաղաքացիական նախաձեռնությունը, և ոստիկանությունում նյութեր են պատրաստվում, քանի որ շուրջ 58 ստորագրությամբ քաղաքացիները հանցագործության մասին հաղորդմամբ դիմել են ոստիկանություն «Թիվ 1 Շուկա» ՍՊԸ-ի իրականացրած անօրինականության համար: «Ոստիկանությունում նյութեր են նախապատրաստվում քրեական գործ հարուցելու համար: Մեզ բոլորիս հրավիրել են ոստիկանություն բացատրություններ տալու, տասնյակ մարդիկ արդեն իսկ բացատրություններ են տվել, և տեսնենք, թե ինչով կավարտվի»,- եզրափակեց իր խոսքը Ստեփան Սաֆարյանը:
Հիշեցնենք, որ ձևավորված մասնագիտական հանձնաժողովը որոշում է կայացրել, որ 2012 թ. մայիսի 27-ին տեղի է ունեցել հիմնական կամարների և դրանց կապող կոնստրուկտիվ համակարգի փլուզում՝ մինչև սեյսմիկ կարը: Չնայած որ աշխատանքները դադարեցված են՝ ներսում տարվող շինաղբի մաքրման աշխատանքները բերել են վիճակի վատթարացման: Ելնելով վերը շարադրվածից՝ հանձնաժողովն առաջարկել է՝
1. Հուշարձանի պահպանված մասի կայունությունը ապահովելու նպատակով եռօրյա ժամկետում՝
– լրամշակել ստորգետնյա ավտոկայանատեղի հիմքերը, պարփակող և կրող համակարգը, անցկացնել փորձաքննություն,
– կանգուն մնացած հատվածի թաղածածկույթի սեյսմիկ կարին հարող երկու թռիչքների ներքո անհապաղ իրականացնել մոնտաժային փայտամած հենարանների համակարգ, այդ հատվածի բեռնաթափման նպատակով:
2. «Երևանի թիվ 1 շուկա» ՍՊԸ-ին սեղմ ժամկետում ՀՀ մշակույթի նախարարության քննարկմանը ներկայացնել հուշարձանի վերականգնման, վերակառուցման նոր էսքիզային նախագիծը՝ պահպանելով հուշարձանի արտաքին և ներքին հորինվածքի գեղարվեստական ճարտարապետական և ծավալատարածական լուծումները:
Կատարել մանրամասն երկրաբանական, հիդրոերկրաբանական և երկրաֆիզիկական ուսումնասիրություններ, այդ թվում՝ տարածքում առկա ջրային հոսքի պատճառները պարզելու նպատակով:
3. ՀՀ մշակույթի նախարարության կողմից համաձայնեցված էսքիզային նախագիծը ներկայացնել Երևանի քաղաքապետարան՝ քաղաքաշինական խորհրդի ճարտարապետական և ինժեներական հանձնաժողովների քննարկմանը:
4. ՀՀ մշակույթի նախարարության և Երևանի քաղաքապետարանի կողմից համաձայնեցված էսքիզային նախագծի հիման վրա սահմանված կարգով մշակել աշխատանքային նախագծի փաթեթը՝ առաջնահերթությունը տալով կառույցի պահպանված մասի կոնստրուկտիվ համակարգի կայունության և հուսալիության ապահովման աշխատանքներին:
