Грузия Online-ի փոխանցմամբ՝ Վրաստանում գտնվող Հարավային Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Ջեյմս Ափաթուրայը երեկ Թբիլիսիի օդանավակայանից մեկնելուց առաջ լրագրողների հետ զրույցում հայտարարել է, որ Ռուսաստանը չի կարող միջամտել ՆԱՏՕ-ին Վրաստանի անդամակցության գործընթացին.
«ՆԱՏՕ-ին Վրաստանի անդամակցությունը կախված է միայն ՆԱՏՕ-ից ու Վրաստանից: Որևէ երրորդ երկիր չի կարող միջամտել դրան: ՆԱՏՕ-ն և Ռուսաստանն ունեն լավ հարաբերություններ, սակայն Ռուսաստանը չի կարող միջամտել ՆԱՏՕ-ին Վրաստանի անդամակցության գործընթացին: ՆԱՏՕ-ին Վրաստանի անդամակցելը հնարավոր կդառնա այն ժամանակ, երբ որ Վրաստանը կհամապատասխանի ՆԱՏՕ-ի չափորոշիչներին:
ՆԱՏՕ-ի հաջորդ գագաթնաժողովը լինելու է ընդլայնման գագաթնաժողով, և միայն Վրաստանից է կախված ընդլայնման ցուցակում նրա ընդգրկվելու հարցը: Եթե Վրաստանը շարունակի բարեփոխումների անցկացումը և եվրոպական չափորոշիչներին համապատասխան ընտրություններ անցկացնի, ապա ՆԱՏՕ-ին նրա անդամակցելը կդառնա իրատեսական»:
Ափաթուրայը գոհունակություն է հայտնել իր վրացական այցի կապակցությամբ, որի շրջանակներում նա հանդիպումներ է ունեցել Վրաստանի խորհրդարանի նախագահ Դավիթ Բաքրաձեի, արտգործնախարար Գրիգոլ Վաշաձեի, փոխվարչապետ և եվրաինտեգրման հարցերով պետնախարար Գիորգի Բարամիձեի, խորհրդարանական մեծամասնության, փոքրամասնության, ոչ խորհրդարանական ընդդիմության ու հասարակության ներկայացուցիչների հետ:
Հիշեցնենք, որ Ափաթուրայը Վրաստան էր ժամանել մասնակցելու համար ՆԱՏՕ-ի օրերին, որոնք անցկացվում են ամեն տարի: Այս տարի դրանք անցկացվում են հունիսի 11-16-ը: