Նախագահի աշխատակազմի վերահսկողական ծառայության պետ Հովհաննես Հովսեփյանը, ԱԺ նախկին նախագահ Սամվել Նիկոյանը, ՀՀ սպորտի և երիտասարդության հարցերի փոխնախարար Խաչիկ Ասրյանը լինելու են ապագա կառավարության կազմում: «Առաջին լրատվական»-ի նախագահական նստավայրի աղբյուրների փոխանցմամբ, հաշվի առնելով այն հանգամանքը, որ առաջիկայում սպասվում է «Հյուսիս-Հարավ» մայրուղու հսկայածավալ աշխատանքների իրականացումը և Հովիկ Հովսեփյանի պարտաճանաչ ու պատասխանատու աշխատաոճը, նա կզբաղեցնի ՀՀ կապի և տրանսպորտի նախարարի պաշտոնը:
Հիշեցնենք, որ Հովիկ Հովսեփյանի անունը երկար ժամանակ է` շաղկապվում է Բուզանդի փողոցում կառուցված էլիտար շենքերում բնակարանների գնորդներին «քցելու» հայտնի մութ պատմությունների հետ: Վերջին օրերին Հովիկ Հովսեփյանի անունը մամուլում շրջանառվում էր նաև ԱԺ աշխատակազմի ղեկավարի պաշտոնի համար: Ավելի վաղ կապի և տրանսպորտի նախարարի պաշտոնում ՕԵԿ-ական նախարար Մանուկ Վարդանյանի փոխարեն շրջանառվում էր Երևանի նախկին քաղաքապետ, ՀՀԿ համամասնական ցուցակով խորհրդարան անցած Գագիկ Բեգլարյանի անունը:
Մարտի 1-ի դեպքերը նպատակային «հորով-մորով» անելուց հետո ԱԺ նախկին նախագահ Սամվել Նիկոյանը ևս կզբաղեցնի նախարարի պաշտոն, թե որ նախարարությունում` դեռևս հստակ չէ: Նախ նրա անունը կապվում էր Բնապահպանության նախարարությունը ղեկավարելու հետ, սակայն մեր աղբյուրները փոխանցում են, որ Արամ Հարությունյանն, այնուամենայնիվ, կմնա իր պաշտոնում, իսկ մասնագիտությամբ ինժեներ Նիկոյանին հավանաբար կուղարկեն Քաղաքաշինության նախարարություն:
Ինչ վերաբերում է վերջին տարիներին քաղաքական այլ դիրքորոշում ունեցող մարզաշխարհին, որոշվել է ՀՀ սպորտի և երիտասարդության նախարարի պաշտոնում նշանակել «Հայոց արծիվների» ղեկավար Խաչիկ Ասրյանին, չնայած խոսակցություններ կային, որ այդ պաշտոնում հնարավոր է նշանակվի ԲՀԿ-ական: Նշենք, որ այս գերատեսչությունում նախարարի պաշտոնի համար շրջանառվում էին այլ թեկնածուների` Խ. Ասրյանի համերկրացի, ՀՀ սպորտի և երիտասարդության հարցերի փոխնախարար Արսեն Քարամյանի, ԱԺ նախկին պատգամավոր Վիկտոր Դալլաքյանի, ծանրամարտի աշխարհի չեմպիոն, օլիմպիական չեմպիոն Յուրի Վարդանյանի անունները:
Հավելենք, որ հինգշաբթի օրը՝ հունիսի 14-ին, կայանալիք ՀՀԿ Գործադիր մարմնի նիստում քննարկվելու են կառավարության կազմի հետ կապված որոշ հարցեր, այդ թվում` նաև ապագա մի քանի նախարարների հարցը:
Լուսանկարը՝ PanARMENIANPhoto-ի
