«Ջրի պակասը միայն տեղումների բացակայության հետ է կապված, Գեղիի հանքին մենք ջուր չենք տալիս: Սուտ է, որ հանքի պատճառով է Կապանին մատակարարվող խմելու ջրի գրաֆիկը խախտվել»,- լրագրողների հետ զրույցում ասաց «Հայջրմուղկոյուղու» «Կապան» տեղամասի պետ Հովհաննես Գևորգյանը:
Նշենք, որ Գեղիի հանքը պատկանում է «Լեռէքս» ՍՊԸ-ին, որտեղ բաժնեմաս ունի նաև Սյունիքի մարզպետը: Հիշեցնենք, որ մոտ 1 ամիս է, ինչ Սյունիքի մարզկենտրոնի ջրամատակարարման գրաֆիկը խախտվել է, ու բնակիչները ջուր էին ստանում օրական 3-4 ժամ: Ջրամատակարարման գրաֆիկում խախտումներ հնարավոր են նաև վթարներից: Սրանք ավելացնում են ջրի կորուստները: Կապանի ներքին ցանցում ջրի կորուստը 90% է կազմում: Ջրի կորուստն ամենաշատը նկատվում է քաղաքի առանձնատների հատվածում: Ընթացիկ տարի Ասիական բանկի 1.5 մլն դոլար ծրագրով Կապանում նախատեսված է ամբողջովին փոխել մայր ջրատարից` Գեղիից մինչեւ քաղաք մտնող խողովակաշարը: Կնորոգվեն նաև ջրամաբարներն ու մաքրման կայանը, իսկ քաղաքի ներսում ամբողջովին կփոխվի ներքին ցանցի 17 կմ-ոց հատվածը: