Հասարակությունն ինչ–որ տեղ ցանկանում է հատուցել բացակայող պետական քաղաքականությունը: Այսօր «Առաջին լրատվական»-ի հետ զրույցում այս մասին ասաց հրապարակախոս Արա Նեդոլյանն՝ անդրադառնալով սահմանային միջադեպերով պայմանավորված մի շարք նախաձեռնություններին, այն է՝ սահմանը պաշտպանելու պատրաստակամությանը:
Ըստ նրա՝ ստեղծված իրավիճակում ամեն ինչի պատճառն իշխանության տևական անգործությունն է, և հասկանալի է, որ հասարակությունն անհանգստացած է, ձգտում է իր ջանքերով ինչ-որ տեղ հատուցել բացակայող պետական քաղաքականությունը: Արա Նեդոլյանի համոզմամբ՝ իրականում հայ-ադրբեջանական հարաբերությունների նորմալացմանն ուղղված բանակցություններ, խաղաղ պայմանագրին հասնելու գործընթաց չկա:
«Չկա այն առումով, որ այստեղ իսպառ բացակայում է Հայաստանի, իբրև պետության, սեփական դիրքորոշումը, սեփական դիվանագիտական նախաձեռնությունը: Պատերազմը մնում է անավարտ, և սա, կարծես թե, իշխանություններին ամենևին էլ չի անհանգստացնում: Ոչ մի բան չեն անում՝ ո՛չ պահանջում են, ո՛չ զիջում, ընդամենը ենթարկվում են կամ չեն ենթարկվում «միջնորդների» նախաձեռնություններին: Հակամարտության լուծման հայկական առաջարկը գոյություն չունի, ինչպես նաև՝ ադրբեջանականը: Կա միայն առեղծվածային «մադրիդյանը», որը չգիտես, թե ում դիրքորոշումն է արտահայտում»,- մեկնաբանեց Արա Նեդոլյանը՝ հավելելով, որ նույն իրավիճակն է տիրում նաև հայ-թուրքական հարաբերություններում: Նրա խոսքերով՝ դա պետական ինֆանտիլիզմ է, որն ամրագրում է ո՛չ պատերազմ, ո՛չ խաղաղություն, ո՛չ բանակցություն թվացյալ վիճակը, որը ցանկացած պահի կարող է փոխարինվել պատերազմով։ Երկրորդ հանգամանքը սխալ սկզբունքներով կազմված բանակն է:
Արա Նեդոլյանը մեջբերեց նախաձեռնություններից մեկի հայտարարությունը. «Մենք, սերունդ տված, հասուն տղամարդիկ, կամավոր գնանք կանգնենք սահմանին, որ փրկենք բանակում ծառայող 18-20 տարեկան պատանիների կյանքը»: Նա սա շատ ճիշտ առաջարկ համարեց, որից, ըստ նրա, երևում է, թե ինչպիսին պետք է լիներ հայկական բանակը՝ կամավոր, ոչ թե՝ հարկադրական, հասուն քաղաքացիներից կազմված, և ոչ թե՝ բռնի տարած պատանիներից: Արա Նեդոլյանը դա «պրոֆեսիոնալ բանակ» անվանեց: Այլապես, ըստ նրա, պետք չէ այն բանակը, որի փոխարեն, վտանգի պահին, կամավորները պետք է գնան սահման պաշտպանեն:
Ամփոփելով իր խոսքը՝ նա ասաց, որ հասարակական անհանգստությունն ու կամավոր նախաձեռնություններն այս վտանգավոր պահին հասկանալի են ու արդարացված: «Սակայն ճիշտ կլիներ այս անցած տարիների ընթացքում ճիշտ պահանջներ ձևավորել և ներկայացնել իշխանությանը, այն է՝ պատասխանատու վարել ու ավարտին հասցնել խաղաղ բանակցությունների գործընթացը, և երկրորդը՝ ստեղծել այնպիսի բանակ, որին վտանգի պահին կարող ենք վստահել մենք և զգուշանա հակառակորդը, և ոչ թե ձևավորել բանակ-զոհ»,- հստակեցրեց իր միտքը հրապարակախոս Արա Նեդոլյանը:
