Լիբիական Բենգազի քաղաքում այսօր հարձակում է տեղի ունեցել Մեծ Բրիտանիայի ավտոշարասյան վրա: Ինչպես հաղորդվում է, ավտոմեքենաներից մեկի վրա արձակվել է ռեակտիվ ռումբ:
Հարձակման հետևանքով վիրավորվել է պահապաններից մեկը` նրա ազգությունը դեռ հայտնի չէ: Հրթիռի ուղիղ նշանակետին հասնելու հետևանքով զրահապատ ավտոմեքենան վնասվել է:
Ինչպես նշել է բրիտանական դեսպանատան ներկայացուցիչը, բոլոր աշխատակիցներն իրենց աշխատատեղերում են: Պատահարի մասին այլ տեղեկություններ դեռ չկան:
Այս տարվա սկզբից երկրի մեծությամբ երկրորդ քաղաք Բենգազիում՝ «փետրվարի 17-ի հեղափոխության օրրանում» մի քանի հարձակում է իրականացվել՝ ինչպես արտասահմանյան ներկայացուցչությունների, այնպես էլ տեղի պետական հաստատությունների վրա: Երեքշաբթի օրը հարձակման է ենթարկվել ԱՄՆ-ի դիվանագիտական ներկայացուցչությունը, սակայն ոչ ոք չի տուժել:
