Դեռահասությունը ճգնաժամային շրջան է, և այս շրջանում դեռահասներից յուրաքանչյուրը կարիք ունի հասկացված լինելու միջավայրի կողմից: Այս կարծիքին է հոգեբանական գիտություների թեկնածու, բժիշկ-հոգեբան Արմեն Ծատուրյանը, ով դժվար դեռահասի անձը բնութագրում է երեք հիմնական միջավայրերի թերություններով` ընտանիք, դպրոց և հասարակություն:
«Նրա վրա մեծ ազդեցություն ունեն փողոցը, բակը, փողոցային խմբերը, ընդ որում` բացասական իմաստով»,- ասում է հոգեբանը և այստեղ բացի ընտանեկան առողջ մթնոլորտից կարևորում դպրոցի և գրագետ ու մանկավարժական արվեստին տիրապետող մանկավարժների դերը:
Հոգեբանի համոզմամբ, դժվար դաստիարակվող դեռահասների մեծ մասը դպրոցին և ընդհանրապես ուսմանը վատ է վերաբերում, ինչի հետևանքով էլ այսպիսի դեռահասները գրեթե միշտ դառնում են դասարանի, դպրոցի, ի վերջո, հասարակական որոշ շերտերի «հակառակորդներ»:
«Հայ ծնողները հաճախ ճնշում են երեխայի հետաքրքրություններն ու ճանաչողական ակտիվությունը: Ու ամենացավալին այն է, որ հայկական իրականության մեջ դեռահասի կյանքում գրեթե նույն դերն են ստանձնում մանկապարտեզներն ու դպրոցները»,-մեզ հետ զրույցում նշեց Արմեն Ծատուրյանը:
Իսկ մանկավարժ Ելենա Գևորգյանը «Առաջին լրատվականի» հետ զրույցում նշեց, որ արդի հայկական դպրոցներում ուսուցման և դաստիարակության պրոցեսը հիմնականում չի համապատասխանում և ոչ մի չափանիշի, այդ իսկ պատճառով դպրոցն ընդունակ էլ չէ ճիշտ շփում հաստատել դեռահասի հետ: Իսկ դպրոցի և մանկավարժական կոլեկտիվի ֆեմինիզացիան հասցնոմ է թողնել իր զգալի ազդեցությունը.
«Դպրոցի «պատասխանատու» պաշտոնները աղջիկների ձեռքում են, իսկ տղաները լսողների ու կատարողների են վերածվում: Եվ չկամենալով ստանձնել այդ դերը` շատ տղաներ փախչում են ընտանիքից ու դպրոցից դեպի փողոց, որտեղ նրանց միջև կազմավորվում են վարքի շեղումներով «դժվար տղաների» խմբեր»,- ասում է ուսուցչուհին:
Իսկ ինչ վերաբերում է դեռահասների և ուսուցիչների կոնֆլիկտային փոխհարաբերություններին, Ելենա Գևորգյանի խոսքով, մերօրյա դպրոցներում դրանք անպակաս են, իսկ բացի մնացած բոլոր պատճառներից` ամենամեծ խնդիրն այն է, որ ուսուցիչների մի մեծ հատված հաշվի չի առնում մի կարևոր հանգամանք` այս շրջանում դեռահասների մոտ ձևավորվում է սեփական կարծիքն ու վերաբերմունքը աշխարհին, որը արհամարհել չի կարելի:
