Հայաստանի իշխանությունների համար ծեծը հավանաբար քաղաքական կամ իրավական կատեգորիա չէ, և ցանկացած չինովնիկ կարող է ծեծելուց ու ծեծվելուց հետո էլ հանգիստ խղճով պաշտոնավարել:
Անցյալ տարվա դեկտեմբերի 10-ին «Հայկական ժամանակ» օրաթերթում տպագրվել էր մի տեղեկատվություն, համաձայն որի` արդարադատության նախարարության դատական ակտերի հարկադիր կատարումն ապահովող ծառայության անձնակազմի կառավարման բաժնի պետ, արդարադատության գնդապետ Ռուբեն Միրաքյանը հարբած վիճակում ծեծի է ենթարկել Դատական ակտերի հարկադիր կատարման ծառայության ղեկավար Միհրան Պողոսյանի տեղակալին:
Ըստ նույն հրապարակման` Միհրան Պողոսյանն էլ Ռուբեն Միրաքյանին պատասխանել է համարժեք կերպով` ծեծով: Այս միջադեպն ուշագրավ է նրանով, որ արդարադատության նախարար Գևորգ Դանիելյանի պաշտոնանկության պատճառ դարձավ: Գևորգ Դանիելյանին արդարադատության նախարարի պաշտոնում փոխարինեց Հրայր Թովմասյանը, իսկ Միհրան Պողոսյանն ու Ռուբեն Միրաքյանը շարունակում են մինչ օրս պաշտոնավարել:
Հայտնի է միայն, որ Գևորգ Դանիելյանը պաշտոնին հրաժեշտ տալուց առաջ հրաման է ստորագրել գլխավոր հարկադիր կատարող Միհրան Պողոսյանի նկատմամբ կարգապահական տույժ կիրառելու մասին:
Օրեր առաջ «Առաջին լրատվականը» ԴԱՀԿ ԱԾ-ից փորձեց տեղեկանալ, թե ինչ ճակատագիր է սպասվում Միհրան Պողոսյանին ու Ռուբեն Միրաքյանին: ԴԱՀԿ ԱԾ մամուլի քարտուղար Ռուբեն Գրդզելյանի հետ մեր գրավոր հարց ու պատասխանը ներկայացնում ենք առանց մեկնաբանությունների:
Հարց` Ռուբեն Միրաքյանն այսօր աշխատո՞ւմ է Դատական ակտերի հարկադիր կատարման ծառայությունում, թե՞ ոչ: Եթե աշխատում է նախկին պաշտոնում, ապա շարունակում է աշխատել նախկի՞ն նախարարի հրամանով, թե՞ նոր:
Պատասխան. Ռուբեն Միրաքյանը աշխատում է ՀՀ ԱՆ դատական ակտերի հարկադիր կատարումն ապահովող ծառայությունում` Անձնակազմի կառավարման բաժնի պետի պաշտոնում, արդարադատության նախորդ նախարարի հրամանով:
Հարց. ԴԱՀԿ ղեկավարի տեղակալին ծեծելու համար նա ենթարկվե՞լ է կարգապահական տույժի, նկատողության, թե՞ ոչ:
Պատասխան. քանի որ հարցը պարունակում է ոչ ճշգրիտ տեղեկություն, ըստ էության, պատասխանելն անհնարին է:
Հարց. եթե Ռուբեն Միրաքյանը շարունակում է պաշտոնավարել, ապա արդարադատության նորանշանակ նախարար Հրայր Թովմասյանը, որը նախաձեռնել է կադրային փոփոխություններ, ինչպե՞ս է պատրաստվում վարվել պետական պաշտոնեությունը սահմանազանցած կադրերի, տվյալ դեպքում` Ռուբեն Միրաքյանի և Միհրան Պողոսյանի հետ, որոնց` ծեծի ենթարկելու մասին պատմությունները հրապարակվել են մամուլում:
Պատասխան. այս հարցի պատասխանը բազմիցս տրվել է, այդ թվում` արդարադատության նախարար Հրայր Թովմասյանի ս/թ հունվարի 17-ին տված ասուլիսում: