Հայաստան-ԱՄՆ հարաբերություններում կա Ռուսաստանի խանդը քաղաքագիտական առումով, «Առաջին լրատվական»-ի հետ զրույցում նման տեսակետ հայտնեց քաղաքագետ Հրանտ Մելիք-Շահնազարյանը` անդրադառնալով Հայաստանի արտաքին քաղաքականությանը:
Ըստ քաղաքագետի` Հայաստանի արտաքին քաղաքականությունը հիմնվում է բազմակողմանիության և հավասարաչափ համագործակցության վրա: Հրանտ Մելիք- Շահնազարյանի խոսքով` եթե Ռուսաստանի դեպքում ավելի ընդգծված է ռազմատնտեսական հարաբերությունների ոլորտում համագործակցությունը, ապա Արևմուտքի հետ քաղաքական համագործակցության խնդիրները լավ զարգացած են և բխում են երկու կողմերի շահերից:
«Արևմուտքի և այս պահին ԱՄՆ-ի առաջնահերթ նպատակների թվում է տարածաշրջանային անվտանգությունը և կանխատեսելիությունը, այս հարցում Հայաստանը իր ռազմական և քաղաքական պոտենցիալով լավ գործընկեր է ԱՄՆ համար: ԱՄՆ-ն բավական դրական է գնահատում այն փոփոխությունները, որոնք տեղի են ունենում Հայաստանի ներքաղաքական կյանքում և մասնավորապես ժողովրդավարության կայացման հարցում»,- նշեց քաղաքագետը` հավելելով, որ ճիշտ են գնահատականները, թե Հայաստան-ԱՄՆ հարաբերություններն իրենց վերելքի փուլում են, թեև, նրա համոզմամբ, լավ զարգանում են Ռուսաստանի հետ հարաբերությունները:
Հրանտ Մելիք-Շահնազարյանի վստահեցմամբ` դա չի հակասում Հայաստան-Ռուսաստան ռազմավարական գործընկերության տրամաբանությանը: «Իհարկե, Ռուսաստանի դեպքում խանդի աստիճան կա, բայց ոչ պետական մտածելակերպում, այլ քաղաքագիտական: Ընդհանուր առմամբ Ռուսաստանի հետ հարաբերությունները ևս խորանում են»,- նկատեց քաղաքագետ Հրանտ Մելիք-Շահնազարյանը:
Հիշեցնենք, որ ամփոփելով ԱՄՆ պետքարտուղար Հիլարի Քլինթոնի այցը Հայաստան, Հայաստանում ԱՄՆ դեսպան Ջոն Հեֆերնն ասել էր, որ պետքարտուղարի այցը մեկ անգամ ևս ցույց դրեց, որ իրական գործընկերությունը խարսխվում է ընդհանուր արժեքների վրա: