Այսօր արտակարգ իրավիճակների նախարարության հասարակայնության հետ կապերի պատասխանատու Նիկոլայ Գրիգորյանը նշեց, որ 2010 թվականին նախարարը զգալի աշխատանքներ է տարել,ավելին՝ այդ աշխատանքները նմանեցրեց սերմնացանության հետ և նկատեց, որ պտուղները առաջիկայում կհավաքենք:
Նախարար Արմեն Երիցյանը, խոսելով կատարված աշխատանքների մասին, վերահաստատեց այդ դիտարկումը: Լրագրողների այն հարցին ի պատասխան, թե արդյոք նախարարը չի՞ ցանկանում խոսել բացթողումների մասին,նախարարը նկատեց, որ բոլորն էլ ցանկանում են իրենց գլուխը գովել, հետո անցնել բացթողումներին:
Խոսելով բացթողումներից՝ նա օրինակ բերեց, որ երեկ, հասնելով այրվող բնակարան, տեսել են, որ բնակիչը մահացած է, և նկատեց, որ պետք է ծառայողական քննություն իրականացնել՝պարզելու՝ հնարավո՞ր է ավելի շուտ հասնել՝ մահվան ելքից խուսափելու համար, միաժամանակ նկատեց, որ դա այնպիսի բացթողում է, որը ամենօրյա աշխատանքի միջոցով փորձում են լրացնել:
Լրագրողները փորձեցին նախարարից հետաքրքրվել նաև, թե իր կուսակցությունը` ՕԵԿ-ը, գո՞հ է իր աշխատանքից, և արդյոք առաջիկա պաշտոնանկությունները նրան չե՞ն սպառնում։ Նախարարը տեղեկացրեց, որ իր կուսակցական ղեկավարությունը շատ գոհ է իր աշխատանքից։
Իսկ այն հարցին, թե արդյոք խոսե՞լ է Գերասիմ Ալավերդյանի հետ պարզելու համար, թե ինչո՞ւ է իր հետ տարել գյուղնախարարության կաբինետի հեռուստացույցները, նա պատասխանեց, որ անձամբ է խոսել Գերասիմ Ալավերդյանի հետ, և նա իրեն հավատացրել է, որ դա հերյուրանք է, ինքը հեռուստացույցի կարիք չունի, որ կաբինետի հեռուստացույցները իր հետ տանի:
