ԱԺ պաշտպանության, ազգային անվտանգության և ներքին գործերի մշտական հանձնաժողովի նախագահ Հրայր Կարապետյանը լրագրողների հետ հանդիպման ժամանակ անդրադարձավ Հայաստանի խորհրդարանը երկպալատ դարձնելու գաղափարին, որը հնչեցրել է Սփյուռքի նախարար Հրանուշ Հակոբյանը:
Կարապետյանը նշեց, որ այդ թեման վաղուց արծարծել է նաև ՀՅԴ Բյուրոյի անդամ Հրանտ Մարգարյանը, և Դաշնակցության քաղաքականության մեջ միշտ եղել է այն հեռանկարը, որ, ի վերջո, սփյուռքը պետք է ակտիվորեն մասնակցի համահայկական հարցերի վերաբերյալ որոշումներ կայացնելուն, ինչպես, օրինակ, հայ-թուրքական հարաբերությունների հարցն էր:
«Թուրքերը միշտ կոչ են անում, որ հրաժարվենք Սփյուռքից և նրա խաղերը չխաղանք, որովհետև նրանք են Ցեղասպանության հարցերը բարձրացնում: Այսօր էլ Հայաստանում կան քաղաքական գործիչներ, որոնք ասում են՝ ո՞ւմ համար են ստեղծում այդ խորհրդարանը: Քո համար են ստեղծում, քո ժողովրդի, քո երկրի համար են ստեղծում։ Ո՞նց կարելի է օտարել քո ազգի մի հատվածը մյուս հատվածից, դա ձեռնտու է միայն մեր թշնամուն»,- կարծիք հայտնեց Կարապետյանը և հավելեց, որ Դաշնակցությունը շատ ուրախ է, որ Սփյուռքի նախարարը խոսել է այդ մասին:
Հրայր Կարապետյանը նշեց, որ Դաշնակցությունը երկու ձեռքով կողմ է բոլոր այն նախաձեռնություններին, որոնք նպաստում են համահայկական ուժերի համախբմանը: Նա նաև հիշեցրեց, որ դեռևս Լևոն Տեր-Պետրոսյանի նախագահության տարիներին ՀՅԴ-ն առաջարկել է ինչպես երկպալատ խորհրդարանի, այնպես էլ Սփյուռքի նախարարության գաղափարը: «Նա, ով ասում է, թե նարինջ ուտողները չպետք է խառնվեն Հայաստանի գործերին, պարզ է, որ չէր համաձայնի: Նարինջ ուտող՝ նկատի ուներ սփյուռքահայերին։ Նա չէր հասկանում, որ սփյուռքահայերը Ցեղասպանության արդյունքում են առաջացել»,- եզրափակեց Կարապետյանը: