Յուրաքանչյուր տարի քաղցկեղից մահանում են ավելի շատ մարդիկ, քան ՁԻԱՀ-ից, մալարիայից, տուբերկուլյոզից: Ըստ հաշվարկների` մահերի մեկ երրորդը կարելի է կրճատել կանխարգելման և ևս մեկ երրորդը` վաղ հայտնաբերման շնորհիվ:
Ըստ Առողջապահության համաշխարհային կազմակերպության տվյալների` համապատասխան միջոցառումներ չկիրառելու դեպքում 2010-2015 թվականների ընթացքում քաղցկեղից աշխարհում կմահանա 84 միլիոն մարդ: Հայաստանում ուռուցքային հիվանդություններով տառապող հիվանդների մեծամասնությունը բուժում է ստանում Ուռուցքաբանության ազգային կենտրոնում:
Քաղցկեղն ունի զարգացման 4 փուլ: Հայաստանում 1-ին տեղում թոքի քաղցկեղն է, որով հիվանդանում է 1200 մարդ, 2-րդը կրծքագեղձի քաղցկեղն է՝ 1100 մարդ, 3-րդը`ստամոքս, հաստ աղի,միզապարկ, սեռական օրգաններ:
«Առաջին փուլում, երբ ուռուցքը փոքր է՝ մինչև 2 սմ, բուժման հաջողությունը հասնում է 70-80 տոկոսի, բուժումից հետո ունենում ենք 5 տարվա ապրելիություն, 2-րդ աստիճանի դեպքում, երբ ուռուցքն ավելի մեծ է, տոկոսն իջնում է 45-50-ի, 3-4-րդ աստիճաններում, երբ կա բավականին մեծ ուռուցք, 10-12 տոկոս է: Հիվանդների 10-12 տոկոսը ապրում է 5 տարի: Որքան շուտ հայտնաբերենք քաղցկեղը, այնքան շուտ կսկսվի բուժումը, և արդյունավետությունը մեծ կլինի»,- նշեց Ուռուցքաբանության ազգային կենտրոնի տնօրեն Գագիկ Բազիկյանը:
Ուռուցքաբանը խորհուրդ է տալիս անպայման հետազոտվել, որովհետև պատճառներն այսօր հայտնաբերված չեն: «Քաղցկեղը չունի յուրահատուկ բնորոշ ախտանիշներ. երբ կա ինչ-որ պրոցես, որ երկար է տևում և ավանդական բուժումով չի անցնում, պետք է ուշադրություն դարձնել, որովհետև դրա տակ կարող է թաքնված լինել այս կամ այն ուռուցքային հիվանդությունը»:
30 տոկոսի դեպքերում քաղցկեղով հիվանդանում են ծխախոտի օգտագործումից, 30-40 տոկոսի պատճառը անորակ և անկանոն սնունդն է, խմիչքը, տարբեր վիրուսներ և ժառանգական ֆակտորը, որն այնքան էլ մեծ չէ`մոտ 15-20 տոկոս:
