Ժնևում գտնվող ՄԱԿ-ի եվրոպական տնտեսագիտական հանձնաժողովը, քննելով Թեղուտի հարցի վերաբերյալ Հայաստանի երեք ՀԿ-ների` «Թրանսփարենսի ինթերնեյշնլ հակակոռուպցիոն կենտրոն», «Էկոդար» և «Վանաձորի հելսինկյան քաղաքացիական անսամբլեայի» դիմումները` Թեղուտի հանքավայրի շահագործման ծրագրի` Օրհուսի կոնվենցիայի մի շարք հոդվածներ խախտելու վերաբերյալ, եզրակացրել է, որ Հայաստանի Հանրապետությունը խախտել է Կոնվենցիան:
Կոմիտեի եզրակացության համաձայն` ՀՀ օրենսդրության և պրակտիկայի մեջ դեռ կան թերություններ, որոնց պատճառով մասնակից պետությունը սույն գործով չի կատարել Օրհուսի կոնվենցիայի 3-րդ հոդվածի 1-ին կետի պահանջը` հանրության մասնակցության առնչությամբ, ինչպես նաև` Կոնվենցայի 6-րդ հոդվածի 2-րդ, 4-րդ և 9-րդ կետերի պահանջները` հանրությանը ժամանակին և վաղ ծանուցելու կոնվենցիայով նախատեսված պարտավորությունը իրականացնելու վերաբերյալ:
Հանձնաժողովը, անդրադառնալով ՀՀ-ի ներկայացրած առարկություններին դիմողների ներկայացրած փաստարկներ, հայտնել է¸ որ Հայաստանում չի ապահովվել հստակ, թափանցիկ և միասնական դաշտ հանրության մասնակցության առնչությամբ Կոնվենցիայի 3-րդ հոդվածի 1-ին մասով նախատեսված դրույթների և պահանջների կատարման համար և որ
ՀՀ-ն չի կատարել շրջակա միջավայրի վերաբերյալ որոշումների կայացման մասով հանրությանը ժամանակին և վաղ ծանուցելու` Կոնվենցիայի 6-րդ հոդվածի 2-րդ կետով նախատեսված պարտավորությունը:
Սակայն, այնուամենայնիվ, ինչպես երևում է, կոնվենցիայի խախտումների արձանագրումը առայժմ ոչ մի կերպ չի ազդում գործի ընթացքի վրա: «Թրանսփերենսի ինթերնեյշնլ» հակակոռուպցիոն կենտրոնի նախագահ Սոնա Այվազյանը «Առաջին լրատվականի» հետ զրույցում նշեց, որ առայժմ գրանցված միակ հաջողությունն այն է, որ դատարանը գոնե մեկ բնապահպանական կեզմակերպության ճանաչեց պատշաճ հայցվոր և այժմ ստիպված կլինի ըստ բովանդակության քննել հարցը:
Սակայն խնդիրն այն է, որ դեռ 2010 թվականի մայիս ամսից մինչ օրս դատը հետաձգվում է: «Օգոստոսին նիստ նշանակվեց և չքննվեց ու առայժմ ոչինչ չկա: Սակայն քանի որ հանձնաժողովի որոշման համաձայն` Հայաստանը հաշվետվություն պետք է ներկայացնի գործի ընթացքի վերաբերյալ, հույս ունենք, որ հայկական կողմը գոնե ձևական կողմը կապահովի»,-նշեց Սոնա Այվազյանը:
