Քաղաքային տնտեսության կառավարման ոլորտում փորձի փոխանակման, մասնագետների վերապատրաստման, կրթության, խորհրդատվական ծառայության և ներդրումային դաշտի զարգացման հետ կապված հարցեր քննարկվեցին Երևանի քաղաքապետ Կարեն Կարապետյանի և ՀՀ-ում Մեծ Բրիտանիայի և Հյուսիսային Իռլանդիայի Միացյալ Թագավորության արտակարգ և լիազոր դեսպան Չարլզ Լոնսդեյլի հանդիպման ընթացքում:
Ողջունելով հյուրին` քաղաքապետը նշեց, որ մայրաքաղաքային տնտեսության մեջ հնարավորին շատ ներդրումային միջոցների ներգրավումը Երևանի քաղաքապետարանի գերակայություններից մեկն է. «Երևանում թափանցիկ, դյուրին և մատչելի բիզնես միջավայրի ապահովման նպատակով, քաղաքապետարանում բիզնես ծրագրերի աջակցման և զարգացման նոր կառույց է ստեղծվել: Երևանը պետք է դառնա բիզնեսի համար գրավիչ մայրաքաղաք»,- նշեց քաղաքապետը: Ծավալված զրույցի ընթացքում կողմերը մտքեր փոխանակեցին նաև քաղաքաշինական ծրագրերի հետ կապված: Կարեն Կարապետյանը նշեց, որ կանաչ գոտիներում շինարարության համար տարածք չի հատկացվելու և մայրաքաղաքում սկզբունքորեն ձևավորվելու է կանաչապատման նոր մշակույթ:
Երևանի քաղաքապետարան
