Սիրիայում լարվածությունն օրեցօր ավելի ու ավելի է սրվում, և եթե իրավիճակը նույն տեմպերով զարգանա, երկիրը աստիճանաբար կներքաշվի քաղաքացիական պատերազմի մեջ: «Առաջին լրատվական»-ի հետ զրույցում նման տեսակետ հայտնեց արևելագետ Արաքս Փաշայանը:
«Եթե ապստամբները շարունակեն ֆինանսական ու ռազմական աջակցություն ստանալ հակաասադական ուժերից, հնարավոր է, որ հակամարտությունը տարածաշրջանային բնույթ ստանա՝ վերաճելով գլոբալ ճգնաժամի: Սա, իհարկե, ամնավատ սցենարն է»,- ասաց նա:
Արևելագետի խոսքերով՝ Սիրիայում լարվածությունը շատ խորն է, երկիրը ներքաշված է ճգնաժամի մեջ: «Ինչ վերաբերում է սիրիահայ համայնքին, ապա տեղի հայ բնակչությունն առկա իրավիճակով անհանգստացած ու մտահոգված է այնքան, որքան այդ երկրի մյուս քաղաքացիները: Սիրիահայերի վիճակն, իսկապես, շատ ծանր է՝ հաշվի առնելով երկրում առկա տնտեսական դժվարին իրավիճակը, քրեածին տարրերի ակտիվացումը և մանավանդ, սոցցանցերում նրանց դեմ ուղղված որոշակի ակցիաները»,- նկատեց Արաքս Փաշայանը:
Ամփոփելով՝ արևելագետը նկատեց, որ Սիրիայում իրավիճակի բարդացմանը զուգահեռ՝ հայերի արտագաղթն անխուսափելի է դառնում. «Առայժմ նման միտում, խուճապ չկա»:
