Ինչպես հաղորդում է Glendale News Press-ը, Հայաստանի կառավարությունը բանակցում է Սթիվի Ուանդերի և մի շարք այլ հայտնի երգիչների հետ Հայոց ցեղասպանության ճանաչման գործընթացն ավելի ներկայացուցչական դարձնելու համար:
Երեքշաբթի երեկոյան մի շարք հայ պաշտոնյաներ և երաժշտական պրոդյուսերներ հրապարակել են «Այլևս երբեք» խորագրով համերգների շարքի մասին, որոնք տևելու են 5 տարի շարունակ և նպատակ ունեն բարձրաձայնելու այս խնդիրը: Համերգների շարքն ավարտվելու է 2015 թ., երբ նշվելու է Ցեղասպանության 100-ամյակը:
«Այն, ինչ հնարավոր չէ անել քաղաքականության միջոցով, կարելի է անել երաժշտության օգնությամբ»,- ասել է Գլենդելում տեղակայված Նկարիչներ հանուն խաղաղության ՀԿ խոսնակ Անուշ Հովսեփյանը:
Հովսեփյանը նաև նշել է, որ համերգների ընթացքում անդրադարձ է լինելու 1948 թ. ՄԱԿ-ի կողմից ընդունված Ցեղասպանությունների վերաբերյալ բանաձևի ընդունումից հետո տեղի ունեցած ցեղասպանություններին Ռուանդայում, Կամբոջիայում և Սուդանում:
Այն մասին, որ ՀՀ կառավարությունն աջակցում է այս ձեռնարկին, հայտնել է նաև Լոս Անջելեսում ՀՀ գլխավոր հյուպատոս Գրիգոր Հովհաննիսյանը:
Առաջին համերգն այս շարքից կանցկացվի սույն թվականի ապրիլի 17-ին Յունիվերսալ Սիթիի Gibson Amphitheatre-ում Սթիվի Ուանդերի, կանադացի երգիչ Դևիդ Ֆոսթերի և հայտնի երգչուհի Ֆլորա Մարտիրոսյանի մասնակցությամբ: Հնարավոր է, որ այս ցուցակում այլ անուններ էլ հայտնվեն: