ԿԳ փոխնախարար Արա Ավետիսյանը, այսօր խոսելով ՀՀ լեզվի օրենքում փոփոխությունների մասին, նշել է, որ իր տեղեկություններով ԱԺ-ում այս պահին քննարկվում է երկրորդ ընթերցմամբ օրենքի վերջնական խմբագրված տարբերակը: Իսկ հարցին` հասարակական նման ընդվզման դեպքում արդյո՞ք փոխնախարարը դիրքորոշումը չի փոխել, նշել է, որ ինքն իր հին կարծիքին է մնացել, եւ որ խմբագրված վերջնական տարբերակը չի խաթարի ազգային գիտակցությունը, ազգային լեզվով մտածողությունը: Փոխարենը կնպաստի ավելի մե՚ծ, ընդգրկուն սպեկտրով աշխարհաճանաչողությանը: Իսկ հարցին` արդյո՞ք մտավորական խավը չի հասկանում այդքանը, որ պայքարի է դուրս եկել, նա նշել է, որ խնդրի վերաբերյալ յուրաքանչյուրն ունի իր պատկերացումը: «Ափսոս, որ մի քիչ անցնում են մեղադրանքների եւ դրանց ներկայացնման ձեւերի սահմանը: Ընդհանուր առմամբ, ես հայտարարել եմ, որ սա շարժող ազդակ հանդիսացավ, երբ հասարակությունը փորձեց տեր կանգնել իր իրավունքին, իր կարծիքը արտահայտելու, իր պարտականությանը վերադարձավ»,- նշել է Արա Ավետիսյանը: Ըստ նրա` շատ կարեւոր հարցերի վերաբերյալ կարծիք արտահայտելը պարկեշտ քաղաքացու ազնիվ պարտականությունն է:
