Ցմահ ազատազրկման դատապարտված Եգիպտոսի նախկին վարչապետ Հուսնի Մուբարաքի որդիները կիրակի կտեղափոխվեն Տորա բանտի հիմնական մասնաշենք, որտեղ շաբաթ օրվանից պահվում է նաև նրանց հայրը: Այս մասին հաղորդում է РИА Новости գործակալությունը՝ հղում անելով «Ալ-Ահրեմ» թերթին: Հրատարակության տվյալներով՝ Ալյան և Գամալը նման խնդրանքով դիմել են բանտային ղեկավարությանը՝ հիմք ընդունելով Եգիպտոսում գործող` ազատազրկված հարազատների վերամիավորման օրենքը: Նման կերպ Ալյան և Գամալը կարող են հաճախ տեսնել հորը` առանց հատուկ թույլտվության:
Հիշեցնենք, որ շաբաթ օրը Եգիպտոսի քրեական դատարանը 84-ամյա Մուբարաքին դատապարտել է ցմահ ազատազրկման 2011թ. ցուցարարներին գնդակահարելու համար: Հենց այդ օրը Մուբարաքին Միջազգային բժշկական կենտրոնից տեղափոխել են բանտային հոսպիտալ: Բանտ տեղափոխվելուց հետո նրա առողջական վիճակը կտրուկ վատացել է, որից հետո նրան որոշ ժամանակով վերակենդանացման բաժանմունք են տեղափոխել: Ինչպես նախատեսվում է, երկուշաբթի նրան կլուսանկարեն բանտային թերթիկի համար և կնշանակեն հերթական համար: Նրան նաև կտան կապույտ համազգեստ, որը նախատեսված է բանտարկյալների համար:
Մուբարաքի որդիների նկատմամբ մեղադրանքը դեռևս չի հաստատվել և դատավճիռ չի կայացվել: Շաբաթ քրեական դատարանը նրանց արդարացրել է, և հիմա նրանք սպասում են նոր դատական գործի, որը վերաբերում է կաշառակերությանը: