Հինգշաբթի առավոտյան Թահրիրում կրկին հնչել են կրակոցներ: Ինչպես հաղորդում է Associated Press գործակալությունը, հայտնի է 3 զոհի մասին: Կրակողները Մուբարաքի կողմնակիցներն են, որոնք երեկվանից պաշարել են Թահրիր հրապարակը` փորձելով այնտեղից հեռացնել ընդդիմության ներկայացուցիչներին: Տեսնելով, որ դա իրենց չի հաջողվում, ընդդիմության որակմամբ՝ իշխող կուսակցության հրոսակախմբերը սկսել են հրազեն կիրառել: 3 զոհի լուրը հաստատում է նաև «Ամերիկայի ձայնը»: Ըստ որոշ աղբյուրների՝ վիրավորվածների թիվն անցնում է 1.5 հազարից: Եպիտական ազգային հեռուստատեսությամբ ելույթ ունեցած առողջապահության նախարարը հաստատել է 5 մարդու զոհվելու փաստը, ավելի քան 800-ի վիրավոր են: Ամբողջ գիշեր շարունակվել են փողոցային մարտերը: Քաղաքում չկա ոստիկանություն: Ըստ ընդդիմության, ինչպես նաև որոշ օտարերկրյա լրագրողների, որոնք անմիջապես ոչ հաճելի շփում են ունեցել Մուբարաքի կողմնակիցների հետ՝ վերջիններիս թվում կան քաղաքացիական հագուստով շատ ոստիկաններ, որոնք պարբերաբար սպառնում են օտարերկրացիներին` պարտադրելով դուրս գալ հրապարակից և չֆիքսել իրենց վայրագությունները: Հաքերների «Անանուններ» խումբը երեկ անցել է հարձակման մեկ այլ ուղղությամբ: Ըստ նույն գործակալության` նրանց զոհն են դարձել եգիպտական կառավարական կայքերը: Չեն գործում տեղեկատվության նախարարության, ինչպես նաև գործող Ազգային ժողովրդավարական կուսակցության կայքերը: Գիշերը հայտարարությամբ հանդես է եկել երկրի փոխնախագահ Օմար Սուլեյմանը: Նա հայտարարել է, որ ընդդիմության հետ բանակցությունների չի գնա այնքան ժամանակ, քանի դեռ նրանք չեն լքել Կահիերի և մյուս քաղաքների փողոցները: Ընդդիմությունն էլ արդեն մի քանի օր է՝ հայտարարում է, որ բանակցությունների սեղանի շուրջ կնստի միայն այն դեպքում, երբ հրաժարական տա Մուբարաքը: