Կահիրեում գտնվող BBC հեռուստաընկերության միջազգային բաժնի խմբագիր Ջոն Սիմփսոնը հայտնում է, որ Ազգային թանգարանի մոտ բախումները կարծես թե դադարել են: Անսպասելիորեն, բայց այս «մարտում» շահել են հակակառավարական ուժերը, որոնք ամբողջ օրվա ընթացքում ստիպված էին դիմակայել անսպասելիորեն նրանց վրա մի քանի կողմերից հարձակում գործած նախագահ Մուբարաքին աջակցող ուժերին: Նրանց հաջողվել է նաև վերահսկողություն պահպանել Թահրիր հրապարակի նկատմամբ, որը դարձել է վերջին օրերի հակամուբարաքյան պայքարի կենտրոնատեղին:
Al-Jazeera-ի ուղիղ եթերում այս պահին ցուցադրվում են Թահրիրի մատույցների մարտերը:
Այս պահին Թահրիրում հավաքված են ընդդիմադիրները, սակայն նրանց մեծ մասը հրապարակի մուտքերի մոտ է, որտեղ այն պաշտպանում են հնարավոր նոր ներխուժումներից: Հրապարակ տանող բոլոր ճանապարհների վրա հրապարակից 300-400 մետր հեռավորության վրա կառուցվել են բարիկադներ:
Հայտնի է, որ ամերիկյան վարչակազմն անընդհատ հանդես է գալիս հայտարարություններով: Ակնհայտ է, որ Օբամայի վարչակազմը խուճապի նշաններ է ցուցաբերում, քանի որ հստակ դիրքորոշում չի արտահայտում տեղի ունեցողի վերաբերյալ, ինչը զայրացնում է ոչ միայն Մուբարաքի դեմ դուրս ելած եգիպտացիների մեծամասնությանը, այլև հենց ամերիկացիներին: Լրագրողներն անընդհատ պահանջում են Օբամայի և պետքարտուղարության խոսնակներին հստակ դիրքորոշում արտահայտել վերջին զարգացումների և Մուբարաքի գործողությունների վերաբերյալ:
Օբամայի վարչակազմի գործողությունները սուր քննադատության է արժանացրել «Սպիտակ տան լրագրողների ասոցիացիան», որը վարչակազմին մեղադրել է վերջին իրադարձությունների վերաբերյալ սուղ տեղեկություններ տրամադրելու համար:
Այն, որ Սպիտակ տունը շփոթված է, ապացուցում են Սպիտակ տան խոսնակ Ռոբերտ Գիբսի խոսքերը, համաձայն որի` իրենք քննարկում են տարբեր սցենարներ, որոնք կարող են հետևել այս զարգացումներին: «Ես կարծում եմ, որ մի քանի օր առաջ դժվար կլիներ պատկերացնել, որ կլինեն այնպիսի զարգացումներ, որոնք տեղի ունեցան երեկ: Մենք հետևում ենք այդ իրադարձություններին: Մենք պատրաստվում ենք հետագա զարգացումներին»,- ասել է Գիբսը:
Նրան նաև հարցրել են, թե արդյո՞ք Օբաման Մուբարաքին բռնապետ է համարում, ինչին Գիբսը պատասխանել է, որ «վարչակազմը հավատացած է, որ նախագահ Մուբարաքը հնարավորություն ունի աշխարհին ցույց տալու, թե ով է նա իրականում` ապահովելով այն փոփոխությունները, որոնց կարիքն ունի իր երկիրը»: Այս մասին հաղորդում է Associated Press գործակալությունը:
Քիչ առաջ հայտնի է դարձել, որ ԱՄՆ նախագահը հեռախոսազրույց է ունեցել Հորդանանի թագավոր Աբդուլլահ Երկրորդի հետ, որի հետ քննարկել է Եգիպտոսի ճգնաժամը: Այս մասին հաղորդում է Reuters գործակալությունը:
Թվերը վիրավորների և սպանվածների վերաբերյալ տարբեր են: Եգիպտոսի առողջապահության նախարարության խոսնակը հայտնել է 1 սպանվածի և 611 վիրավորների մասին: Twitter միկրոբլոգերի կայքում տեղեկություններ կան 3 սպանվածի և մի քանի հարյուր վիրավորների մասին: Ավելի վաղ ընդդիմությունը հայտնել էր 15 սպանվածի մասին:
ՄԱԿ-ի նախկին գլխավոր քարտուղար Բութրոս Բութրոս Ղալին, որը երկրի Մարդու իրավունքների պաշտպանն է, հայտնել է, որ անհրաժեշտ է բոլոր սպանվածների գործերով քննություն անցկացնել` որպեսզի պարզվի, թե իրականում ինչ է տեղի ունեցել:
Այսօր խոսել է նաև Եգիպտոսի արտգործնախարարության խոսնակ Հուսամ Զաքին, որը խոսել է արտաքին ուժերի ճնշման և նրանց հայտարարությունների անթույլատրելիության մասին:
Հիշեցնենք, որ այսօր օտարերկրյա շատ ղեկավարներ պահանջել էին, որպեսզի Մուբարաքը որքան հնարավոր է արագ իրականացնի իշխանության հանձնումը ժողովրդավարական ընտրությունների միջոցով ձևավորված իշխանություններին:
Al-Jazeera-ի ուղիղ եթերում քիչ առաջ խոսում էր Եգիպտոսի հնությունների նախարար Նուրեդդին Աբդուլսամադը, որը հայտարարեց, որը Մուբարաքը պետք է հրաժարական տա` մեղադրելով նրան «Եգիպտոսն այրելու մեջ»: Նա նաև տեղեկացրեց, որ իրենք չգիտեն հստակ, թե ինչեր են գողացվել Կահիրեի Ազգային թանգարանից, բայց նաև ավելացրեց, որ կորուստները մեծ են:
