Ադրբեջանական 1news.az-ը, վկայակոչելով իսրայելական Izrus-ին, հայտնում է, որ Ադրբեջանի կողմից Israeli Aerospace Industries (IAI) կոնցեռնի կողմից սպառազինության խմբաքանակի գնումը նրան փրկել է խոշոր վնասներից՝ կապված զենքի վաճառքի շուկայի կտրուկ կրճատման հետ:
Արևմտյան երկրները սկսել են ավելի քիչ սպառազինություն և քաղաքացիական սարքավորում (ոչ մեծ քաղաքացիական ինքնաթիռների շարժիչներ) գնել Իսրայելից՝ կապված տնտեսական ճգնաժամի հետ: 2012 թվականի սկզբին Ադրբեջանի պաշտպանության նախարարության ու IAI-ի միջև կնքվեց 1.6 միլիարդ դոլարի ռազմական արտադրանքի գնման մասին պայմանագիր, ինչն իսրայելական ընկերությանը փրկեց ֆինանսական լուրջ դժվարություններից:
Այս տարվա առաջին եռամսյակում IAI-ի մաքուր շահույթն աճեց 16 տոկոսով՝ համեմատած նախորդ տարվա միևնույն ժամանակահատվածի հետ՝ կազմելով 54 միլիոն դոլար: Ադրբեջանի ու IAI-ի միջև գործարքի մասին հայտնի դարձավ փետրվարին: Խոսքը անօդաչու թռչող սարքերի (ԱԹՍ) և հակաօդային պաշտպանության (ՀՕՊ) նորագույն համակարգերի մատակարարման մասին է:
Դրա հետ մեկտեղ պայմանավորվածություն էր ձեռք բերվել, որ իսրայելցի մասնագետները կժամանեն Ադրբեջան՝ տեղի իրենց գործընկերներին սովորեցնելու համար նոր ռազմական համակարգերի հետ աշխատանքը:
Հիշեցնենք, որ երկու օր առաջ ադրբեջանական մամուլը գրել էր, թե Իսրայելն Ադրբեջանի հետ կնքել է ևս մեկ խոշոր ռազմական գործարք: Իսրայելական «Ավիացիոն արդյունաբերության» կոնցեռնն Ադրբեջանի հետ պայմանագիր է կնքել մի քանի տասնյակ անօդաչու թռչող սարքերի (ԱԹՍ) մատակարարման մասին:
Նշվում էր, որ կողմերը բավական երկար են բանակցել տվյալ խնդրի շուրջ և, ի վերջո, բանակցությունները հաջողությամբ են պսակվել: Խոսքը մի գործարքի մասին է, որը գերազանցում է Թուրքիայի հետ կնքված նմանատիպ համաձայնագիրը, որը մասնագետները գնահատել էին 300 միլիոն դոլար:
