Սյունիքի մարզում արդեն 4 օր է` շարունակվում են առատ տեղումները։ Կապանի քաղաքապետարանի հետ կնքած պայմանագրի համաձայն` մարզկենտրոնի փողոցների ձնամաքրման աշխատանքներն իրականացնում է «ՖՊԶ» ընկերությունը։
Աշխղեկ Վիլեն Հակոբյանի խոսքով, կա համապատասխան տեխնիկա և աշխատուժ։ Ընկերության 5 «Բելառուս» մակնիշի տրակտորները, մինի-ձյունմաքրիչները բավական են, որ քաղաքի ավտոճանապարհները երթևեկելի լինեն։
Այնուամենայիվ, առավոտյան ավտովարորդները բողոքում էին, որ աղ չի ցանվել։ Ընկերության ներկայացուցիչը այլ կարծիքի է. «Պիտի տեխնիկան մաքրի, նոր աղ ու ավազ ցանվի, դա հերթականությամբ է արվում»,-ասաց աշխղեկը։ Ինչ վերաբերում է ծայրամասային թաղամասերի՝ Կավարտ, Բաղաբուրջ, Վաչագան տանող ճանապարներին, ապա դրանք նույնպես կմաքրվեն ձյունից։
Ամեն դեպքում, ընկերության պատասխանատուները հավաստիացրին, որ ճանապարհները երևեկելի են լինելու։ Իսկ կոմունալ տնտեսություն աշխատակիցներն մայթերին էին աղ ցանում։
Ինչ վերաբերում է Երևան-Մեղրի միջպետական ճանապարհի` Սյունիքի մարզի տարածքով անցնող հատվածին, ապա այն բաց է և երթևեկելի:
Միայն Սիսիան-Գորիս, Շուռնուխ-Կապան, ճանապարհը դժվարանցանելի է, հատկապես` մարդատար մեքենաների համար:
Մեղրու լեռնանցքում, որը մայրուղու ամենաբարձր հատվածն է, ամբողջ գիշեր Մեղրու ճանապարհաշինարարները մաքրել են ձյունը, շաղ տվել աղ և ավազ:
Վերջին օրերին Սյունիքում տեղացող ձյան առատ տեղումների պատճառով խոշոր ավտովթարներ չեն արձանագրվել:
