Ինչպես գրում է The Financial Times-ը, Google ընկերությունը մեղադրել է իր մրցակից Microsoft-ին, քանի որ վերջինս իր որոնողական Bing համակարգում օգտագործել է Google փնտրողական համակարգի տվյալները:
Google-ի հայտարարության համաձայն` Microsoft-ը զբաղվում է գրագողությամբ, որպեսզի կարողանա կրճատել առաջատարից իր հետ մնալը: Google ստուգումները կատարող Մետ Կատսը մրցակցի քաղաքականությունն անվանել է «խելահեղություն» և Microsoft-ին առաջարկել է ինքնակամ ընդունել գրագողության հանգամանքը, ինչպես նաև հաշվետվություն ներկայացնել տվյալների մասին, որոնք գողացվել էին Google-ից` Bing-ի աշխատանքներն ավելի արդյունավետ դարձնելու համար:
Ինչպես պարզվել է, որոնման տվյալները, որոնք Microsoft Internet Explorer 8-ից օգտվողները ստանում են Google-ից, ավտոմատ կերպով ուղարկվում են Microsoft-ի համապատասխան ծրագրին:
Microsoft-ի ներկայացուցիչ Հերի Շրամը մեղադրանքներին ի պատասխան չի ընդունել ուղիղ գրագողության հանգամանքը:
«Մենք ոչ մի բան չենք արտատպում,- հայտնել է նա: – Մենք մեծացնում ենք մեր բազան` ստանալով տվյալներ օգտատերերից, որոնք իրենց կամքով կիսվում են մեզ հետ: Ինտերնետի զարգացումն անհնարին կլիներ առանց ինֆորմացիայի կոլեկտիվ փոխանակման»: