Ո՛չ Հայաստանում Ռուսաստանի դեսպանատունը, ո՛չ էլ Հայաստանում ՌԴ պաշտոնական ներկայացուցչությունը որևէ տեղեկություն չունեն՝ նախատեսվա՞ծ է արդյոք ՌԴ նախագահ Վլադիմիիր Պուտինի՝ սեպտեմբերին Հայաստան կատարելիք պետական այց, թե՞ ոչ: «Առաջին լրատվական»-ի հետ զրույցում այս մասին ասաց Հայաստանում Ռուսաստանի դեսպանատան մամուլի կցորդ Սերգեյ Աբելյանը:
«Առաջին լրատվական»-ի ռուսաստանյան դիվանագիտական աղբյուրների տեղեկություններով՝ այս պահի դրությամբ Վլադիմիր Պուտինի օրակարգում Հայաստան այցելություն նախատեսված չէ:
Հիշեցնենք, որ մայիսի 30-ին կայացած մամուլի ասուլիսի ժամանակ ԱՊՀ երկրների ինստիտուտի տնօրեն Կոնստանտին Զատուլինը հայտարարել էր, որ ներկայումս ընթանում են Ռուսաստանի նախագահ Վլադիմիր Պուտինի` Հայաստան կատարելիք պետական այցի նախապատրաստական աշխատանքները:
Նրա խոսքով՝ որոշվում է նաև այցի օրը, առաջարկ կա այցը կազմակերպել սեպտեմբերի 7-ին, երբ Հայաստանում ընթանան ՀԱՊԿ զորավարժությունները: Դա նաև խորհրդանշական օր է` Բորոդինոյի ճակատամարտի օրը,- հիշեցրել էր Զատուլինը: