Հայտնի ամերիկյան բասկետբոլիստ Դենիս Ռոդմանին դատապարտել են 104 ժամվա ուղղիչ աշխատանքի՝ ալիմենտների չվճարման համար: Ռոդմանի դեմ նաև սահմանվել է 3 տարի պայմանական ժամկետ: Այս մասին հայտնում է Associated Press-ը:
Դենիս Ռոդմանը նախկին կնոջը պարտք է 800 հազար դոլար, որը պետք է հատկացներ երկու երեխաների խնամքի համար: Դատական գործընթացի ժամանակ բասկետբոլիստը բազմիցս հայտարարել է, որ ինքը գումար չունի՝ ալիմենտներ վճարելու համար: 51-ամյա Ռոդմանի խոսքով՝ ինքը ստիպված մասնակցում է Ասիայի և Եվրոպայի ցուցադրական խաղերին՝ ալիմենտների վճարման համար գումար հայթայթելու նպատակով:
Ռոդմանը նշել է, որ չի չարանում նախկին կնոջ նկատմամբ այն բանի համար, որ նա դատարան է դիմել: Բասկետբոլիստը հայտարարել է, որ ուղղիչ աշխատանքներն իր համար մեծ խնդիր չեն:
Դենիսն ու Միշելը ծանոթացել էին 1999 թվականին: Մեկ տարի անց, լույս աշխարհ է եկել նրանց որդին՝ Դի Ջեյը, իսկ 2001-ին դուստրը՝ Տրինիտին: Դենիսն ու Միշելն ամուսնացել են 2003-ին, սակայն մեկ տարի անց, մարզիկի կինը ապահարզան է պահանջել:
Ռոդմանը NBA-ի՝ Բասկետբոլի ազգային ասոցացիայում հանդես է եկել «Detroit Pistons»-ի,«San Antonio Spurs»-ի,«Chicago Bulls»-ի, «Los Angeles Lakers»-ի և «Dallas Mavericks»-ի կազմում: Մարզիկը 5 անգամ դարձել է ասոցացիայի չեմպիոն՝ անցկացնելով ավելի քան 900 խաղ: 2011-ին նա ներկայացվել է NBA-ի փառքի սրահում:
Ռոդմանը մի քանի անգամ տարբեր պատճառներով, այդ թվում՝ բռնաբարության կասկածանքով, հայտնվել է իրավապահների ուշադրության կենտրոնում:
