Վաղուց է հայտնի, որ կաթնատվությունը բարձրացնելու համար պետք է կովերը բավարար սնվեն, մշտապես մաքուր ջուրը հասանելի լինի նրանց, և կենդանիներին ժամանակին կթեն: Սակայն ամերիկացի ֆերմերները կարծում են, որ այդքանը բավարար չէ:
Ինչպես տեղեկացնում է CBS-ը, Վիսկոնսին նահանգի ֆերմերները վստահ են, որ կաթնատվությունը բարձրացնելու համար կովերին պետք է պարբերաբար մերսել: Յուրաքանչյուր սեանսը, որը անցկացնում են հատուկ սովորած անասնաբույժները, արժե 75 դոլար: Սակայն որոշ ֆերմերներ նախընտրում են այդքան գումար չծախսել և ախոռներում տեղադրում են հատուկ պտտվող խոզանակներ, որոնք ինքնուրույն են մերսում կենդանիների մեջքը, ուսերն ու մռութը:
Ինչպես պարզվում է, կովերն անտարբեր չեն նաև երաժշտության հանդեպ: Բազմաթիվ ֆերմերները այդ նպատակով նրանց համար գրեթե ամեն օր դասական «համերգներ» են կազմակերպում: Երաժշտությամբ մթերատվությունը բարձրացնելու մեթոդը միայն ԱՄՆ-ում չէ, որ կիրառվում է: Վերջերս Գերմանիայում Դորտմունդի ֆիլհարմոնիայի նվագախումբը գնացել էր տեղի ֆերմաներից մեկը, որտեղ նոր ծրագրով է հանդես եկել 180 կովերի առջև: Դրանից հետո կենդանիները շարունակել են երաժշտություն լսել, սակայն արդեն ձայնագրած: Այդ հանգամանքներում ստացված կաթը, ըստ գնորդների, հաճելի համային նրբերանգով առանձնացել է:
Մինեսոտայի համալսարանի պրոֆեսոր Մարսիա Էնդրեսի խոսքով՝ կովերին շատ պետք չէ ծանրաբեռնել: Նրանք չեն կարող միանգամից հարմարվել բազմաթիվ նորարարություններին: Կենդանիները չեն սիրում, երբ իրենց շուրջը միանգամից մի քանի փոփոխություններ են լինում: