Երեկ Եգիպտոսի նախագահ Հոսնի Մուբարաքի ելույթից հետո, ավանդույթի համաձայն, նրան է զանգել ԱՄՆ նախագահ Բարաք Օբաման` քննարկելու երկրի ներքաղաքական զարգացումների վերջին զարգացումները: Այս մասին հաղորդում է Associated Press գործակալությունը:
Հեռախոսազրույցի մասին հայտնել է ինքը` Օբաման, Եգիպտոսի ներքաղաքական իրավիճակի կապակցությամբ հատուկ հայտարարության ժամանակ:
Օբաման ասել է, որ անհապաղ պետք է սկսել խաղաղ իշխանափոխության գործընթաց, որի արդյունքը պետք է լինի երկրում արդար և ազնիվ նախագահական ընտրությունների անցկացումը:
Նա շեշտել է, որ դա պետք է անել «վճռականորեն, ընդդիմադիր կուսակցությունների ներգրավմամբ, սակայն՝ խաղաղ պայմաններում»:
ԱՄՆ նախագահն ասել է, որ Մուբարաքը գիտակցում է ստեղծված իրավիճակի լրջությունը և այն, որ փոփոխություններն անխուսափելի են:
Օբաման նաև շեշտել է, որ Եգիպտոսի ապագան պետք է որոշեն եգիպտացիները, և ոչ ոք իրավունք չունի միջամտել այդ գործընթացներին:
«Բայց մենք պետք է հավատարիմ մնանք հիմնական արժեքներին, այդ թվում` Եգիպտոսի ժողովրդի խաղաղ հանրահավաքների, արտահայտման ազատության և տեղեկատվության ստացման ազատության իրավունքին»,- ավելացրել է Միացյալ Նահանգների նախագահը:
Տեղեկացնենք նաև, որ Մուբարաքի ելույթից հետո խոսել է նաև ընդդիմության առաջնորդ Մուհամադ Ալ-Բարադեին` հայտնելով, որ ցուցարարների պահանջներին ընդառաջ գնալու Մուբարաքի հայտարարությունները երկրի ծեր ղեկավարի հերթական հնարքն են, որպեսզի ավելի երկար մնա իշխանության:
Նա կրկին ասել է, որ պահանջում է նախագահի հրաժարականը: Իսկ իր առաջադրման մասին հարցին պատասխանել է, որ դա իր առաջնային խնդիրների թվում չէ: Այս մասին հաղորդում է CNN-ը:
Հիշեցնենք, որ կեսգիշերին Եգիպտոսի նախագահ Հոսնի Մուբարաքը հայտարարել է, թե պատրաստվում է հանգստի գնալ միայն նախագահի ժամկետի լրանալուց հետո` այս տարվա աշնանը: