Տոկիոյի ոստիկանությունը ձերբակալել է երկու ամերիկացու, որոնցից մեկին կասկածում են տեղի հյուրանոցներից մեկում իռլանդացի ուսանողուհուն սպանելու մեջ: Մարդասպանի զոհն է դարձել 21-ամյա Նիկոլա Ֆերլոնգը, որը «ուսանողափոխանակության» ծրագրով սովորում էր Տակասակի քաղաքի համալսարանում:
Մայիսի 24-ի վաղ առավոտյան աղջիկը անգիտակից հայտնաբերվել էր Տոկիոյի հյուրանոցի իր համարում: Հիվանդանոց տեղափոխվելուն պես, նա մահացել է: Դիահերձման արդյունքում պարզ է դարձել, որ աղջկան խեղդել են:
Ըստ տեղի լրատվամիջոցների՝ Ֆերլոնգը Տոկիո էր մեկնել մահվան նախօրեին: Երեկոյան նա իր ընկերուհու հետ համերգ է գնացել տեղի ակումբ: Այնտեղ աղջիկները ծանոթացել են 2 սևամորթ ամերիկացիների՝ 23-ամյա պարող Ջեյմս Բլեքսթոնի ու 19-ամյա ստեղնահարի հետ: Վերջինիս անունը չի հայտարարվում, քանի որ նա անչափահաս է: Մամուլում նրան կոչում են պայմանական աունով՝ Լարի Փերրի:
Համերգից հետո երիտասարդները տաքսի են պատվիրել և ուղևորվել հյուրանոց, այնտեղ զույգերն առանձնացել են համարներում: Գիշերը հյուրանոցի այցելուներից մեկը գանգատվել է բարձր աղմուկից: Հյուրանոցի աշխատակիցները բարձրացել են համար և այնտեղ բռնացրել Ֆերլոնգին՝ 19-ամյա երաժշտի հետ:
Անձնակազմի ցուցմունքի հիման վրա ամերիկացի ստեղնահարը հարցաքննվել է: Վկայություն չկա նրանց համարում երրորդ անձի ներկայության մասին: Ներկայում երաժշտի և նրա ընկերոջ դեմ ներկայացվել է սեռական բնույթի բռնի գործողություններ իրականացնելու մեղադրանք: Վկայություններ կան այն մասին, որ դեռևս տաքսու մեջ, ամերիկացիները ձեռք են գցել իռլանդացի ուսանողուհու հարբած ընկերուհուն:
