Իսպանացի ռեժիսոր Խավիեր Կրաեն մայիսի 28-ին կկանգնի դատարանի առաջ` հավատացյալների զգացմունքները վիրավորելու համար: Այս մասին գրում է El Pais պարբերականը:
Մեղադրանքը ռեժիսորին ներկայացվել է իր 54-վայրկյանանոց «Ինչպես պատրաստել Հիսուս» ֆիլմի համար: Ավելի վաղ նրան փորձել էին երկու անգամ դատի տալ, սակայն երկու անգամ էլ գործը փակվել էր:
Կրաեն դատական գործընթացը աբսուրդ է համարում: Նրա խոսքով` իրեն մեղադրում են նրանում, ինչ ինքը չի գործել:
«Ես անձամբ չեմ «պատրաստել» Հիսուսին հեռուստացույցով, ես չեմ հայտնվում ֆիլմում ու ոչ մի տեղ կադրեր չեմ ցուցադրել ֆիլմից»,- հայտարարել է ռեժիսորը:
«Ինչպես է հնարավոր ընդհանրապես ապացուցել, որ ինչ-որ մեկի կրոնական զգացմունքները վիրավորվել են»,- հարց է տալիս Կրաեն:
Կրաեի ու Էնրիկե Սեսենյիի ֆիլմը նկարագրում է Հիսուսի պատրաստման բաղադրատոմսը:
Հանդիսատեսին խորհուրդ է տրվում Հիսուսի մարմինն առանձնացնել խաչից, լավ չորացնել, համեմել, ապա 3 օրով դնել ջեռոց:
Չնայած ֆիլմը նկարահանվել է 1978թ.՝ այն իր վրա ուշադրություն է հրավիրել միայն 2004-ին, երբ դրանից կադրեր են ցուցադրվել Canal+ հեռուստաալիքով:
Ի պաշտպանություն ռեժիսորի հանդես են եկել Իսպանիայի մշակութային բազմաթիվ գործիչներ` երգիչ Վիկտոր Մանուելը, դերասան Սանտյագո Սեգուրան, գրող Միգել Թոմաս-Վալիենտեն ու այլք:
