1928թ. այս օրը Կահիրեում Հայ հեղափոխական դաշնակցության որոշմամբ հիմնվեց հայ կրթական և հրատարակչական Համազգային ընկերությունը («Հայ կրթական և հրատարակչական համազգային ընկերություն»):
Գործունեության հենց առաջին տարիներին Համազգայինը ջանքեր է գործադրում տարբեր երկրներում մասնաճյուղեր հիմնելու և դրանք նյութապես ապահովելու ուղղությամբ. մասնաճյուղեր են ստեղծվում Սիրիայում, Լիբանանում, Եգիպտոսում: Գործունեության սկզբում Կենտրոնական վարչությունը հաստատված էր Կահիրեում:
1928թ. մայիսի 28-ին ընկերության հիմնադիր նիստում խմբագրվում և ընդունվում է նորաստեղծ ընկերության կանոնագրքի նախագիծը: Ընկերության հիմնադիր 9 անդամներն էին Համո Օհանջանյանը, Ստեփան Եսայանը, Գասպար Իփեկյանը, Լևոն Շանթը, Նիկոլ Աղբալյանը, Մինաս Խաչատրյանը, Սեդրակ Պալգճյանը, Հակոբ Պալգճյանը և Սարգիս Մալխասյանը:
Միությունը գործում է ՀՅԴ հովանու ներքո:
1990թ. օգոստոսին Աթենքում գումարված Համազգայինի համասփյուռքյան առաջին պատգամավորական ժողովում ընդունվում է միության անվան ներկա վերափոխված տարբերակը` «Համազգային հայ կրթական և մշակութային միություն»:
