Սևծովյան-Կասպյան տարածաշրջանի քաղաքական և սոցիալական հետազոտությունների ինստիտուտի տնօրեն, պրոֆեսոր Վլադիմիր Զախարովը «Նովոստի» միջազգային մամուլի կենտրոնում ասուլիսի ժամանակ հայտարարեց, որ Հարավային Կովկասում իրավիճակն այսօր անհանգիստ է:
Նա կարծիք հայտնեց, որ Ղարաբաղի հարցը մոտ ապագայում չի լուծվելու: Ըստ նրա` Իլհամ Ալիևը հասկանում է, որ հարձակումը Ղարաբաղի վրա կլինի ագրեսիա, և ինքը ագրեսոր կհռչակվի:
Զախարովը նշեց, որ Իրանը ցանկանում է Ղարաբաղի հարցը լուծված տեսնել խաղաղ ճանապարհով: Նրա դիտարկմամբ, ԵԱՀԿ Մինսկի խումբը զբաղված է սեփական փիառով և լավ գումարներ վաստակելով:
Զախարովն ասաց, որ Ղարաբաղի անկախության ձեռքբերումը հնարավոր է, քանի որ Ղարաբաղը կայացած պետություն է, և այնտեղ իշխանական բոլոր կառույցները աշխատում են:
Նա տարակուսանք հայտնեց, թե ինչպես է, որ մեր բիզնես էլիտան չի ֆինանսավորում, որպեսզի հրապարակվեն Ղարաբաղի պատմությունը ներկայացնող գրքեր:
Մինչդեռ ինքը արտերկրի համալսարաններում տեսել է գրքեր՝ ադրբեջաներենից անգլերեն թարգմանված: