Ինչպես փոխանցում են Եգիպտոսում աշխատող լրատվամիջոցները, Եգիպտոսում և՛ իշխանությունները, և՛ ընդդիմությունը նախապատրաստվում են այսօր կայանալիք երթին, որին մասնակցելու է մինչև 1 միլիոն մարդ:
Համենայնդեպս, այդպիսի հայտարարություն են արել երթը կազմակերպող ընդդիմադիր ուժերը` խոստանալով փողոց հանել որքան հնարավոր է շատ մարդու: Նրանք ծրագրավորել երթն ուղղել նաև դեպի նախագահական նստավայր: Կարծիքներ կան, եթե հավաքվի մի քանի հարյուր հազար մարդ, ցուցարարներն այլևս անկասելի կլինեն:
Այս պահին հայտնի է, որ մեծ հոսք է նկատվում դեպի այս հեղափոխության խորհրդանիշը դարձած Թահրիր հրապարակ, որտեղ օրեր շարունակ, անտեսելով պարետային ժամը, հավաքվում են տասնյակ հազարավոր մարդիկ:
Երկրում շարունակում է անջատված մնալ ինտերնետ կապը:
Գիշերը մենք տեղեկացրել էինք, որ դադարեցվել է երկաթգծային և ավիահաղորդակցությունը: Սրանով իշխանությունները փորձում են նվազեցնել երթի մասնակիցների թիվը:
Al-Jazeera -ի հաղորդմամբ, իշխանությունները պարետային ժամը 24-ժամյա դարձնելու որոշում են կայացնելու:
Երեկ բանակի հայտարարությունից հետո, համաձայն որի՝ բանակը չի կրակելու ցուցարարների վրա, քանի որ նրանց գործողություններն անօրինական չեն, զինվորական միավորումները սկսել են հեռանալ Թահրիր հրապարակից: Ըստ ականատեսների` նրանց թիվը շատ փոքր է այդ հրապարակի մերձակայքում:
Ինչպես փոխանցում է The New York Times օրաթերթը, ամերիկյան կառավարությունը Եգիպտոս է ուղարկել Ֆրանկ Վիսներին, որն ամերիկյան դիվանագիտության հնաբնակներից է համարվում, որպեսզի տեղում ծանոթանա իրավիճակին, ինչպես նաև եգիպտական իշխանությունների հետագա քայլերին: ԱՄՆ պետդեպարտամենտի խոսնակ Ֆիլիպ Քրոուլին հայտարարել է, որ Վիսլերն անձամբ հանդիպելու է նախագահ Մուբարաքի հետ:
Ավելի քան 50 կազմակերպություններ, որոնք Եգիպտոսում զբաղվում են մարդու իրավունքներով, կոչ են արել Մուբարաքին հրաժարական տալ:
Ինչպես բնորոշ է այս տիպի ռեժիմներին, իշխանությունները պետական հեռուստատեսությամբ ցուցադրում են Մուբարաքի կողմնակիցների, որոնք հայտարարում են, թե «առանց Մուբարաքի իրենք կյանք չունեն»:
Հեռուստատեսությունն ամեն ինչ անում է, որպեսզի իրավիճակը ներկայացնի այնպես, կարծես երկրում գրեթե ոչինչ տեղի չի ունենում: