Եգիպտոսում և Թունիսում իրականացված հեղափոխությունները դեռ իրենց հետևանքները թողնելու են: «Առաջին լրատվականի» հետ զրույցում նման կարծիք հայտնեց «Սարդարապատ» շարժման նախաձեռնող խմբի անդամ Հայկ Բալանյանը:
Նրա խոսքերով, կարևոր է ոչ թե այն, թե ով էր այս ամենի հետևում կանգնած, այլ այն, թե ինչ հետևանքներ դա կբերի.
«Եգիպտոսը հանդիսանում էր Միացյալ Նահանգների և Իսրայելի առանցքային դաշնակիցը: Եթե այնտեղ փոխվում է այն վարչակարգը, որ կա, ապա դա մեծագույն պրոբլեմներ է ստեղծում Իսրայելի համար:
Եթե Մուբարաքի վարչակարգը փլուզվի, ապա Միացյալ Նահանգները և Իսրայելը կկորցնեն շատ կայուն դաշնակից, Եգիպտոսը կհամալրի իսլամիստական երկրների շարքը, Իսրայելի համար կառաջանան շատ լուրջ ռազմական խնդիրներ:
Իսլամիստական շարժումների հաղթանակները մեծագույն մարտահրավեր են նաև Սաուդյան Արաբիայի և Ծոցի թագավորությունների համար, որովհետև այնտեղ նույնպես դժգոհությունների առիթներ շատ կան, և այդ դոմինոյի էֆեկտը կարող է հարցականի տակ դնել արքունիքների մենիշխանությունը Ծոցի երկրներում»:
Բալանյանի դիտարկմամբ, այս փոփոխություններում, բացի տուժողներից, կլինեն նաև շահող երկրներ, մասնավորապես Թուրքիան և Իրանը:
«Հենց այդ իմաստով այդ պրոցեսները մեզ համար շատ կարևոր են, մենք պետք է հիշենք, որ մենք Եվրոպայի մաս չենք, այլ Միջին Արևելքի: Դա կարող է հանգեցնել Թուրքիայի դերի բարձրացմանը, Միջին Արևելքում ուժերի վերադասավորմանը, և բացի նրանից, որ այդ երկրներում մենք մեծ գաղութներ ունենք, այդ փոփոխությունները նաև կարող են ազդել տարածաշրջանային պրոցեսների վրա:
Ներկայումս ԱՄՆ-ն փորձում է պրոցեսը կառավարել և առաջնորդել Եգիպտոսի ընդդիմությանը, բայց նույնիսկ այդ պարագայում դա լինելու է այլ Եգիպտոս: Այս ամենը նաև կարող է բերել Միացյալ Նահանգների դիրքերի թուլացմանը. մենք պետք է պատրաստ լինենք, որ միգուցե ԱՄՆ-ն շատ լուրջ նահանջի տարածաշրջանում, և այստեղ մեծանալու է Թուրքիայի և Իրանի ազդեցությունը»,- նշեց Բալանյանը: