«Թահրիր» հրապարակում հավաքվածներն այսօր որոշում են կայացրել, որ ուրբաթ օրը հանրահավաքի ժամանակ նրանք պատրաստվում են երթ անել դեպի նախագահական նստավայր, խորհրդարանի և հեռուստատեսության շենքերը, իսկ մինչ այդ բանակը պետք է հստակ կողմնորոշվի, թե ում կողմն է անցնում` ժողովրդի՞, թե՞ ռեժիմի: Այս մասին հայտարարել են Եգիպտոսի երիտասարդական կազմակերպությունները` այդ օրն անվանելով «Հեռացման ուրբաթ»:
«Մենք` Եգիպտոսի երիտասարդությունն ու ժողովուրդը, պահանջում ենք ազգային բանակում գտնվող մեր եղբայրներից հստակ սահմանել իրենց դիրքորոշումը` անցնելու փողոց դուրս եկած իրական լեգիտիմությամբ օժտված միլիոնավոր եգիպտացիների կողմը կամ մնալու մեր ժողովրդին սպանող, նրանց ահաբեկող և նրանցից գողացող ռեժիմի ճամբարում», ասվում է հայտարաության մեջ:
Նրանք բանակին ժամանակ են տվել մինչև հինգշաբթի առավոտ: Պատասխանի բացակայությունը նրանք կհամարեն աջակցություն Եգիպտոսում հաստատված ռեժիմին:
Երթը տեղի է ունենալու ուրբաթ օրը, երբ մուսուլմաններն աղոթքի են դուրս գալիս, իսկ քրիստոնյաները ծես մատուցում:
Միաժամանակ, Ազատական ժողովրդավարական ճակատ կուսակցությունը այսօր երեկոյան պատրաստվում է այսօր հանդես գալ հայտարարությամբ, որտեղ կոչ է անելու բանակին չխառնվել ներքաղաքական զարգացումներին և չճնշել ցուցարարներին:
«Մենք հավատացած ենք, որ նախագահը փորձում է ներգրավել բանակը ժողովդի հետ հակամարտության մեջ». Al-Masry Al-Youm կայքին ասել է կուսակցության խոսնակ Իբրահիմ Նավարը: «Մեր հայտարարության մեջ մենք բանակին հիշեցնելու ենք, որ այն ժողովրդի վահանն է», ավելացրել է նա:
Նավարը նաև կարծիք է հայտնել, որ բանակն օգտագործվելու է կանխելու համար բազմաթիվ ցուցարարների մուտքը «Թահրիր» հրապարակ, որը դարձել է կենտրոնական հավաքատեղի տասնյակ հազարավոր ցուցարարների համար վերջին 6 օրերի ընթացքում:
