Wikileaks-ի հերթական հրապարակումը առնչվում է Տաջիկստանի նախագահ Էմոմալի Ռահմոնին, որն ամերիկյան դիվանագետներին պատմել է, որ ռուս գեներալները զբաղվում են թմրանյութերի վաճառքով:
Բացի այդ, նա մտավախություն է ունեցել, որ Կրեմլը հեղաշրջում կկազմակերպի իր երկրում:
«Ռուս գեներալները ցանկանում էին, որ մենք թույլ մնանք, որպեսզի իրենց ընկերները կարողանան իրենց խաղը տանել և մեծ գումարներ աշխատել թմրանյութերի վաճառքից»,- ասել է Ռահմոնը մի քանի տարի առաջ:
«Նայե՛ք, թե ինչ ունեին այստեղ։ Նրանք երկու տարի այստեղ մնալուց հետո վերադառնում էին Մոսկվա ու վերջին մոդելի «Մերսեդես» և էլիտար բնակարաններ գնում:
Կարծո՞ւմ եք, դա իրենց աշխատավարձի հաշվին էին անում: Ի՞նչ եք կարծում, ինչո՞ւ էին ռուս գեներալները ամբողջ Կարմիր հրապարակի երկարությամբ հերթ կանգնում, որպեսզի այստեղ նշանակում ստանան:
Որպեսզի իրենց հայրենասիրական պա՞րտքը կատարեն»,- ասել է Ռահմոնը:
Ռահմոնը նաև ավելացրել է, որ երբ ինքը համապատասխան միջոցառումներ է ձեռք առել, Պուտինը հասկացել է, որ իրենց խաղն ավարտված է, և հեղաշրջում իրականացնել հնարավոր չէ:
Դրանից հետո ռուսները հանել են իրենց սահմանապահներին:
Հիշեցնենք, որ 2005 թվից ռուս սահմանապահներն այլևս չեն հսկում աֆղանա-տաջիկական սահմանագիծը, որտեղից մեծ քանակությամբ թմրանյութ է անցկացվում։
